Паслявыбарчыя акцыі пратэсту ў Беларусі працягваюцца 230 дзён. Сёння беларусы ўпершыню паспрабавалі масава выйсці на вуліцы пасля зімы. «Белсат» падводзіць вынікі дня.
Сёння прыхільнікі пераменаў спрабавалі правесці вялікую акцыю пратэсту ў Менску з нагоды Дня Волі.
Сілавікі з самай раніцы пачалі сцягваць у цэнтр гораду спецтэхніку, спрабуючы запужаць людзей, а Следчы камітэт увогуле папярэдзіў, што ўсіх, каго сёння затрымаюць, прыцягнуць да крымінальнай адказнасці.
Прыкладна а 12:30 у Менску пачаліся першыя затрыманні каля станцыі метро «Пушкінская».
Пачатак акцыі прызначылі на 14:00 у раёне плошчы Бангалор.
Вялізарны БЧБ-сцяг быў заўважаны сёння ў раёне Уручча.
Прыкладна а 16:30 большая частка сілавікоў з’ехала з раёну плошчы Бангалор.
«РИА Новости» са спасылкаю на МУС Беларусі паведамляе, што сёння ў аддзяленні міліцыі прывезлі больш як 100 затрыманых.
Пад сённяшнюю хвалю затрыманняў таксама трапілі і шэсць прадстаўнікоў СМІ. Усе яны ўжо на волі.
Затрыманых рэдактарак TUT.by Ганну Калтыгіну і Галіну Уласік адпусцілі без складання пратаколаў.
Таксама адпусцілі фатографку «Нашай Нівы» Надзею Бужан і журналістку Кацярыну Карпіцкую з «Нашай Нівы».
Пасля некалькіх гадзінаў у Кастрычніцкім РУУС Менску адпусцілі журналістку Любоў Бахурэвіч з газеты «Белорусы и рынок». У міліцыі на яе склалі пратакол.
Журналістка распавяла, што не бала ўдзелу ў пратэставай акцыі. Яе затрымалі побач з домам, яна жыве непадалёк ад плошчы Бангалор.
Галоўнага рэдактара «Нашай Нівы» Ягора Марціновіча вызвалілі каля 21:30, але з двума пратаколамі: за непадпарадкаванне і ўдзел у незаконным масавым мерапрыемстве.
Марціновіча затрымалі разам з Надзеяй Бужан у раёне плошчы Бангалор: спачатку ягоную машыну спынілі даішнікі і павялі на размову, але пасля амапавец суправадзіў яго ў аўтазак.
Віталь Макей, сын Уладзіміра Макея, раскрытыкаваў скандальную заяву МЗС Беларусі, адрасаваную ЗША.
Уладзімір Макей адрэагаваў на заяву сына допісам у Instagram. Дарэчы, гэта першы допіс міністра ў сацсетках з 1 чэрвеня 2020 года.
«Велізарная колькасць каментароў наконт учорашняе заявы прэс-службы МЗС, прытым канстытуцыйная большасць – пазітыў, гаворыць пра правільнасць і актуальнасць пытання. Дарэчы, гэтая заява датычыць не толькі заакеанскіх партнёраў, але і тых, хто бліжэй…ЛЮБЛЮ БЕЛАРУСЬ!!!» – напісаў кіраўнік МЗС Беларусі.
У Наваградскім гістарычна-краязнаўчым музеі затрымалі групу каля 10 чалавек, якія прыйшлі туды на экскурсію.
Працаўніца музею распавяла, што людзі прыйшлі і аплацілі экскурсію па горадзе пра гісторыю наваградскіх татараў. А другой гадзіне экскурсавод музею Настасся Грыцкевіч выйшла да групы на плошчу, але ёй не далі нават пачаць экскурсіі – групу акружыла міліцыя.
Экскурсавода не забралі, праз некалькі хвілінаў яна вярнулася ў музей, папрасіла касіра вярнуць грошы, бо экскурсія не адбылася, і аднесла іх групе. Пасля людзей павезлі ў РАУС.
У музеі ўдакладнілі, што ўдзельнікі групы не махалі сцягамі і не былі ніяк пазначаныя.
У хаце і майстэрні мастака Алеся Пушкіна правялі ператрусы і панішчылі карціны
У вёсцы Бобр, дзе жыве мастак Алесь Пушкін, у межах крымінальнай справы адбыўся ператрус. Яго праводзілі ў хаце і ў майстэрні мастака.
На ператрус, які распачаўся а 2:00 уначы, прыехалі з Гарадзенскага аддзелу Следчага камітэту і пяцёра амапаўцаў. Забралі тэлефоны і тэхніку ўсіх сямейнікаў, у тым ліку няпоўнагадовых сына і дачкі.
У майстэрні мастака сілавікі панішчылі карціны і пабілі шкло.
Студэнтку Полацкага дзяржаўнага ўніверсітэту Аляксандру Буку змясцілі ў ізалятар часовага ўтрымання. Яе вінавацяць у «абразе прадстаўніка ўлады».
Як распавяла TUT.by маці студэнткі, да дзяўчыны прыйшлі з ператрусам, калі яна вярнулася ў інтэрнат з заняткаў.
«Яна паспела мне пра гэта паведаміць праз тэлефон. Ад ейных сяброў я даведалася, што пры ператрусе ў дачкі сканфіскавалі тэхніку, магчыма, нешта яшчэ. Пазней удалося высветліць, што Алесю затрымалі да 72 гадзінаў па падазрэнні ў здзяйсненні злачынства паводле артыкулу 369 КК («Абраза прадстаўніка ўлады»). Яна ў ІЧУ», – распавяла Юлія Бука.
Аляксандра вучыцца на 4 курсе гуманітарнага факультэту Полацкага дзяржуніверсітэту, вывучае рамана-германскую філалогію.
АД, belsat.eu