Нацбанк падвёў вынікі 2022 года і агучыў некаторыя паказнікі стану ў эканоміцы краіны. Інфляцыя і інфляцыйныя чаканні застаюцца даволі высокімі. А беларусы ва ўмовах нявызначанасці эканамічнага развіцця аддавалі перавагу зберажэнню сваіх сродкаў.
Паводле справаздачы Нацбанку Беларусі, у апошнім квартале мінулага года працягнулася запавольванне інфляцыі. У снежні летась гадавы прырост коштаў склаў 12,8 %. У верасні 2022 года інфляцыя ў гадавым выразе складала 17,4 %.
Разам з гэтым інфляцыйныя чаканні беларусаў таксама зніжаліся на працягу апошніх трох кварталаў мінулага года, але надалей заставаліся павышанымі.
Скарачэнне рэальнага ВУП у IV квартале летась склала каля 4,7 % да адпаведнага кварталу 2021 года. Абумоўлена гэтым зніжэннем выпуску ў прамысловасці. Але зніжэнне тэмпаў падзення ВУП адбывалася на фоне стрыманага ўнутранага попыту і нізкай спажывецкай і інвестыцыйнай актыўнасці.
«Ва ўмовах нявызначанасці эканамічнага развіцця насельніцтва аддавала перавагу зберажэнню. У сувязі з гэтым гадавы тэмп рознічнага тавараабарачэння працягнуў скарачацца. У справаздачным квартале ён склаў мінус 7,1 %, кварталам раней – мінус 6,1 %», – гаворыцца ў справаздачы Нацбанку.
Гадавы тэмп зніжэння тавараабарачэння ў харчовым сегменце напрыканцы мінулага года склаўся на ўзроўні мінус 4 %. Продажы ў нехарчовым сегменце скараціліся на 10 %.
Нацбанк прызнаецца, што на працягу году пільна ставіўся да кантролю сітуацыі на фінансавым рынку і жыццяўляў кантроль за дынамікай грашовай прапановы.
Алена Аляксандрава belsat.eu
