«Белсат» распавядае пра рэпрэсіі рэжыму Аляксандра Лукашэнкі, што чыняцца супраць беларускага народу, за 26 снежня.
Менскі гарадскі суд абвясціў вырак спартоўцам Аляксандры Герасімені і Аляксандру Апейкіну. Іх прыгаварылі да 12 гадоў пазбаўлення волі за заклікі да санкцыяў супраць Беларусі (ч. 3 арт. 361 КК). Справу разглядалі ў межах спецыяльнага вядзення. Спартоўцы сталіся першымі беларусамі, каго беларускі суд асудзіў завочна.
Таксама суд арыштаваў маёмасць і грошы на рахунку Герасімені, у ліку якіх кватэра, гаражнае месца, побытавая і аўдыяапаратура. Усё гэта пойдзе ў лік пагашэння цывільнага пазову на суму больш за Br 700 тысячаў.
«Пачыталі прысуд, пасмяяліся, і працягнулі далей святкаваць. Як кажуць, завочна вы мяне можаце нават расстраляць!», – адрэагавала на прысуд Герасіменя.
У Менскім гарадскім судзе 26 снежня вынеслі прысуды кіраўнікам Беларускага кангрэсу дэмакратычных прафсаюзаў. Аляксандр Ярашук атрымаў чатыры гады калоніі ва ўмовах агульнага рэжыму, Сяргей Антусевіч – два гады, а Ірына Бут-Гусаім – год і шэсць месяцаў. Такія ж тэрміны запрашваў пракурор. Актывістаў абвінавачвалі ў дзеяннях, якія груба парушаюць грамадскі парадак (ч.1 арт 342), а Ярашука таксама ў закліках да санкцыяў (ч.3 арт. 361).
У Менску абвесцілі прысуд 33-гадоваму былому следчаму і ініцыятару праекту «ByChange» Яўгену Юшкевічу. Яму прысудзілі 11 гадоў калоніі ва ўмовах узмоцненага рэжыму па шасці артыкулах Крымінальнага кодэксу, у тым ліку за «арганізацыю масавых беспарадкаў» у 2020 годзе, «распальванне іншай сацыяльнай варожасці» ў інтэрв’ю і тэкстах у сацсетках, «пагрозу гвалтам» начальніку ІЧУ на Акрэсціна праз твіт.
Сілавікі затрымалі блогера, аўтара тэлеграм-каналу «Спадчына» і рэдактара «Вікіпедыі» Уладзіслава Чаховіча. На «пакаянным» відэа ён кажа, што «супраць дзейнай улады» і «падтрымлівае Украіну».
Уласніка «Кальяннай № 1» і журналіста Івана Мураўёва асудзілі да 2,5 гадоў калоніі ва ўмовах агульнага рэжыму. Палітзняволенага абвінавацілі паводле ч. 3 арт. 361-1 КК («Удзел у экстрэмісцкім фармаванні») за відэаздымкі для расследавання журналіста Стася Івашкевіча, якое выйшла на тэлеканале «Белсат».
Палітзняволенага анархіста Сяргея Раманава адправілі ў памяшканне камернага тыпу (ПКТ) на 4 месяцы. Увесь час адміністрацыя ваўкавыскай калоніі цісне на палітвязня: яго ўжо некалькі разоў змяшчалі ў штрафны ізалятар, на месяц адпраўлялі ў ПКТ, а таксама пазбавілі рэжымнай перадачы і званкоў. 22 снежня Менскі абласны суд прызначыў анархістам Аліневічу і Раманаву – па 20 гадоў калоніі, Рэзановічу – 19 гадоў калоніі, Дубоўскаму – 18 гадоў калоніі.
Слонімскаму журналісту і краязнаўцу Сяргею Чыгрыну працягнулі адміністрацыйны арышт яшчэ на 15 содняў. 23 снежня ён мусіў вызваліцца пасля 7 содняў за перапосты з «экстрэмісцкіх рэсурсаў. Аднак яго пакінулі ў ізалятары на выходныя і ў панядзелак правялі чарговы суд. За час зняволення ён пазбавіўся працы ў драмтэатры.
За ўдзел у пратэстах ГУБАЗіК затрымаў брата і сястру – Міхаіла і Аляксандру Разуванавых. Нібыта яны ў 2020 годзе ўдзельнічалі ў паслявыбарчых акцыях пратэсту. Верагодна, на іх распачалі крымінальную справу.
Алена Рувіна belsat.eu