Казахстан і Сербія не будуць прызнаваць «рэферэндумаў» на акупаваных тэрыторыях Украіны
У самаабвешчаных Данецкай і Луганскай народных рэспубліках, а таксама ў Запарожскай і Херсонскай вобласцях 23 верасня пачаліся так званыя рэферэндумы аб далучэнні да Расеі. Аднак некаторыя краіны ўжо заявілі, што не будуць прызнаваць «рэферэндумаў» на акупаваных тэрыторыях Украіны.
Афіцыйны прадстаўнік Міністэрства замежных справаў Казахстану Айбек Смадыяраў агучыў пазіцыю краіны ў гэтым пытанні, паведамляе казахскі партал Liter.kz:
«Што датычыць правядзення самаабвешчанымі дзяржавамі ЛНР і ДНР і ваеннымі адміністрацыямі Запарожскай і Херсонскай вобласцяў рэферэндумаў аб далучэнні да Расеі, то Казахстан зыходзіць з прынцыпаў тэрытарыяльнай цэласнасці дзяржаваў, іх суверэннай роўнасці і мірнага суіснавання».
Дружалюбная да Расеі Сербія таксама выказала сваю пазіцыю і заявіла, што не будзе прызнаваць псеўдарэферэндумаў, арганізаваных РФ на акупаваных тэрыторыях поўдня і ўсходу Украіны. Пра гэта сказаў міністр замежных справаў Ныкола Сэлакавіч, піша партал «N1».
На пытанне пра «рэферэндумы» Сэлакавіч сказаў, што Сербія, зыходзячы з прынцыпаў міжнароднага права і ўласных інтарэсаў, не можа прызнаць іх вынікаў:
«Па-першае, мы прынцыпова прытрымліваемся прынцыпаў міжнароднага права і Хартыі ААН, па-другое, гэта цалкам супярэчыла б нашым дзяржаўным і нацыянальным інтарэсам і нашай палітыцы захавання тэрытарыяльнай цэласнасці, суверэнітэту і прынцыпаў непарушнасці межаў».
Сербія таксама катэгарычна адмаўляецца прызнаць незалежнасць Косава.
Тым часам у Беларусі заявілі, што яшчэ трэба «вывучыць сітуацыю».
«Мы прызнаем Расею. Ніхто не можа дакладна прадказаць, што будзе заўтра. Мы вывучым сітуацыю і прымем рашэнне, згодна з нашымі нацыянальнымі інтарэсамі, а не з інтарэсамі якой-небудзь іншай краіны», – сказаў міністр замежных справаў Беларусі Уладзімір Макей у інтэрв’ю тэлеканалу «France 24».
Галасаванне пра далучэнне акупаваных тэрыторыяў Украіны да РФ павінна завяршыцца 27 верасня. ЗША ды іншыя краіны Захаду ўжо асудзілі правядзенне рэферэндумаў і заявілі, што не будуць прызнаваць іх вынікаў. У пачатку жніўня прэзідэнт Украіны Уладзімір Зяленскі казаў, што ў выпадку правядзення рэферэндумаў на акупаваных украінскіх тэрыторыях Расея страціць магчымасць любых перамоваў з Кіевам.
Алена Рувіна belsat.eu
