Байцы беларускага добраахвотніцкага батальёну ўзялі актыўны ўдзел у вызваленні ад расейскіх захопнікаў паселішча Лук’янаўка ў Кіеўскай вобласці Украіны. Відэа размовы з камбатам беларусаў апублікаваў батальён «Братэрства Дмытра Карчынскага».
Як адзначаецца, беларускія вайскоўцы штурмавалі ворага з адным танкам і двума БМП, колькасць праціўнікаў была ўдвая большая.
У выніку баёў беларусы здолелі не толькі выбіць ворага, але і захапіць частку тэхнікі, у тым ліку адзін танк. Пацярпелых сярод беларусаў няма.
«Чаго нам баяцца. Мы змагаемся за праўду. Мы вольныя людзі. Таму перамога за намі», – адзначыў беларускі камандзір з пазыўным Іваноў.
Ён папярэдзіў, што беларусы будуць ваяваць і супраць войскаў рэжыму Аляксандра Лукашэнкі, калі тыя ўвойдуць ва Украіну, ды параіў ім здавацца ў палон.
Нагадаем, што пад Ірпінём у цяжкіх баях беларуская група знішчыла тры варожыя БМП. Пры гэтым, як паведамляецца, быў цяжка паранены адзін з байцоў батальёну – Зміцер Апанасовіч. Яго тэрмінова завезлі ў шпіталь, але выратаваць жыццё ў дактароў не ўдалося.
ПС belsat.eu