Беларускія дыяспары з розных куткоў свету 25 сакавіка выйшлі на вуліцы сваіх гарадоў, каб адзначыць нацыянальнае свята – Дзень Волі. Паказваем, як гэта было.
БЕЛЬГІЯ
Беларуская дыяспара ў Антвэрпэне сабралася разам у Дзень Волі, каб напісаць лісты нашым палітвязням, пачытаць вершы беларускіх класікаў і разам праспяваць гімн «Пагоня». Таксама дыяспара абмеркавала дапамогу і падтрыманне ўкраінскага народу.
Беларусы ў Бруселі адзначылі 104-ы Дзень Волі разам з тымі, хто прыйшоў на плошчу каля Еўрапарламенту – з дзіцячымі калыскамі на акцыю салідарнасці з украінскім народам «Абараніце і захавайце ўкраінскіх дзяцей!».
ВЯЛІКАЯ БРЫТАНІЯ
Беларусы ў Лондане ў Дзень Волі выйшлі на акцыю дзеля падтрымання Украіны на Трафальгарскую плошчу.
«Украіна моцная духам, людзі ваююць за сваё права на жыццё. Але гэта вайна, крывавая і бязлітасная – патрэбная дапамога цяпер, а не заўтра! Усе разам мы зможам спыніць вайну і захаваць Украіну», – кажуць удзельнікі акцыі.
НАРВЕГІЯ
У Дзень Волі беларусы Нарвегіі таксама прынялі ўдзел у акцыі салідарнасці з Украінай. Украінская супольнасць праводзіць штодзённыя дэманстрацыі ў Осла, у іх бяруць удзел і беларусы.
ІЗРАІЛЬ
У Тэль-Авіве з нагоды святкавання Дня Волі правялі канцэрт.
Таксама акцыя прайшла ў ізраільскім горадзе Ашдод, адным з найстарэйшых гарадоў свету. Там ужо шосты год адбываецца акцыя «Дзень Волі Ля Мора». У гэты дзень да помніку народнаму паэту Беларусі Янку Купалу ўскладаюцца жывыя кветкі.
ЯПОНІЯ
У Японіі на Дзень Волі адбыўся адзіночны пікет ля падножжа гары Тэнно пад Кіёто.
ПОЛЬШЧА
У Беластоку беларусы завяршылі Дзень Волі канцэртам у Беластоцкім лялечным тэатры. На імпрэзе да 104-й гадавіны абвяшчэння незалежнасці Беларускай Народнай Рэспублікі выступіў Вольны хор – ікона беларускіх пратэстаў 2020–2021 гадоў, а таксама гурт «NaviBand» і Зміцер Вайцюшкевіч. Перад канцэртам таксама прамаўляла Святлана Ціханоўская.
Беларусы польскага гарадка Шчэцін таксама адсвяткавалі Дзень Волі.
ЗША
Беларусы ў ЗША выйшлі на Дзень Волі ў Нью-Ёрку.
АД belsat.eu