«Гэта мусіць спыніцца». Прэс-сакратар замежнапалітычнай службы ЕЗ асудзіў вырак Дар’і Лосік
Прэс-сакратар Еўрапейскай службы замежнапалітычнай дзейнасці Пэтэр Стана зрабіў афіцыйную заяву наконт прысуду, агучанага 19 студзеня ў дачыненні беларускай палітзняволенай і маці чатырохгадовага дзіцяці Дар’і Лосік. Стана назваў гэты прысуд ганебным і палітычна матываваным.
«Мінулым тыднем суд у Берасці вынес чарговы ганебны і палітычна матываваны вырак, што працягвае рэпрэсіі рэжыму Лукашэнкі супраць народу Беларусі. Дар’ю Лосік асудзілі на два гады калоніі за тое, што яна ў інтэрв’ю абараняла мужа ад сфабрыкаваных абвінавачванняў і апелявала да Лукашэнкі, настойвала на невінаватасці мужа», – гаворыцца ў заяве Пэтэра Стана.
Ён нагадвае, што муж палітзняволенай Ігар Лосік быў асуджаны за вядзенне папулярнага блогу на 15 гадоў калоніі ўзмоцненага рэжыму, а іхнае чатырохгадовае дзіця засталося без бацькоў.
«Рэпрэсіі, што чыніць рэжым Лукашэнкі, дасягнулі беспрэцэдэнтнага ўзроўню і закранулі ў тым ліку найбольш уразлівых грамадзянаў – дзяцей. Такое бесчалавечнае абыходжанне з грамадзянамі Беларусі мусіць спыніцца», – заяўляе прэс-сакратар замежнапалітычнай службы ЕЗ.
Ён падкрэслівае, што Еўразвяз ізноў патрабуе неадкладнага вызвалення палітычных зняволеных у Беларусі і «будзе далей падтрымліваць усіх, хто імкнецца да свабоднай, дэмакратычнай і незалежнай Беларусі».
Берасцейскі абласны суд 19 студзеня прысудзіў Дарʼі Лосік 2 гады калоніі агульнага рэжыму. Такі вырак прыняў так званы суддзя Мікалай Грыгаровіч. Дарʼінага мужа Ігара Лосіка асудзілі на 15 гадоў калоніі ў снежні 2021 года. Палітзняволеныя маюць 4-гадовую дачку, якая цяпер пад апекаю бабулі і дзядулі. Станам на 26 студзеня ў Беларусі ў няволі застаюцца 1445 палітычных зняволеных.
Зміцер Міраш belsat.eu
