«Следчыя не могуць знайсці доказаў». Анджэліцы Борыс працягнулі арышт на тры месяцы
Старшыня Саюзу Палякаў у Беларусі застанецца пад вартай да 25 лютага 2022 году. Яна знаходзіцца за кратамі ўжо 8 месяцаў.
Следчы камітэт Беларусі прыняў рашэнне аб працягненні тэрміну ўтрымання Анджэлікі Борыс яшчэ на тры месяцы. Імаверна, пастанова датычыць таксама журналіста Анджэя Пачобута, паведамляе партал znadniemna.pl – прэсавы орган Саюзу Палякаў у Беларусі.
Анджэліку Борыс і Анджэя Пачобута затрымалі ў межах «справы палякаў» у Дзень волі – 25 сакавіка. Іх абвінавацілі ў распальванні варожасці (арт.130 КК РБ) за публікацыі і папулярызацыю ведаў пра польскае антыкамуністычнае падполле на Гарадзеншчыне. Абодвум пагражае да 12 гадоў турмы. Беларускія праваабаронцы прызналі іх палітвязнямі.
Па «справе палякаў» былі таксама арыштаваныя лідаркі Саюзу Палякаў з Ліды, Ваўкавыску і Берасця: Ірэна Бярнацкая, Марыя Цішкоўская і Ганна Панішава. Іх вызвалілі і прымусілі пакінуць Беларусь.
«Следчыя дагэтуль не могуць перадаць крымінальную справу супраць палякаў у суд, што можа сведчыць пра цяжкасці са зборам доказаў віны арыштаваных, ці з неабходнасцю змянення кваліфікацыі іхных учынкаў на такую, якую з пункту погляду следчых было б прасцей даказаць», – зазначае партал znadniemna.pl.
PJ/ГГ, belsat.eu
