«Беларусь – сховішча для злачынцаў». Прэзідэнт Літвы заклікаў узмацніць усходнія межы NATO
Прэзідэнт Літвы назваў Беларусь сховішчам для ваенных злачынцаў. Так Гітанас Наўседа напісаў у сваім Twitter, каментуючы паведамленні пра тое, што кіраўніку ПВК Вагнэра дадуць прытулак у нашай краіне.
Рада нацыянальнай абароны Літвы зладзіла сёння пасяджэнне праз прыгожынскі мяцеж. «Мы ўважліва разгледзелі падзеі ў Расеі, дзе рэжым становіцца ўсё больш уразлівым», – паведаміў прэзідэнт рэспублікі Гітанас Наўседа.
«Мы таксама адзначылі, што Беларусь стала сховішчам для ваенных злачынцаў», – напісаў літоўскі лідар.
Ён заклікаў узмацніць усходнія межы NATO.
«Кантроль межаў NATO і абарона ягонага ўсходняга флангу – гэта самае важнае!» – адзначыў Наўседа.
Ад’езд Яўгенія Прыгожына ў Беларусь стаўся ўмоваю ўгоды аб спыненні мяцяжу ў Расеі. Перамовы з кіраўніком ПВК Вагнэра вёў Лукашэнка.
Сяргей Крот belsat.eu
