У Багдадзе адбыўся выбух у шпіталі для хворых на COVID-19. Больш за 80 чалавек загінулі
У сталіцы Іраку Багдадзе ў лякарні для пацыентаў з COVID-19 выбухнуў кіслародны балон, у выніку чаго адбыўся пажар. Па меншай меры 82 чалавекі загінулі і 110 атрымалі раненні, паведамляе выданне «Al Jazeera».
Выбух кіслароднага балона адбыўся на першым паверсе ў лякарні Ібн Аль-Хаціб, дзе размяшчалася аддзяленне інтэнсіўнай тэрапіі. Выданне адзначае, што выбух і пажар адбыліся з-за невыканання ўмоў захоўвання кіслародных балонаў.
Служба грамадзянскай абароны па надзвычайных сітуацыях паведаміла, што ў момант пажару ў лякарні знаходзіліся 120 чалавек, 90 з іх удалося выратаваць.
Відавочцы з месца пажару распавядаюць, што людзі спрабавалі выратавацца і выскоквалі з вокнаў бальніцы.
Паведамляецца, што ў лякарні не выконваліся меры супрацьпажарнай бяспекі, у прыватнасці агонь хутка распаўсюджваўся, паколькі на столі былі лёгкаўзгаральныя матэрыялы.
Прэм’ер-міністр Ірака Мустафа аль-Кадхімі распарадзіўся правесці расследаванне катастрофы, а таксама затрымаць кіраўніка лякарні, кіраўнікоў службаў бяспекі і тэхнічнага абслугоўвання.
Акрамя таго, у краіне абʼяўлена трохдзённая нацыянальная жалоба па загінулых.
АД, belsat.eu
