Мы ўжо разважалі пра тое, што афіцыйна абвешчаны склад алімпійскай зборнай Беларусі на гульнях белай Алімпіяды ў Пекіне будзе перажываць змены. І гэта датычыць не толькі беларускай дэлегацыі.
Працэс натуральны, яго не пазбегнуць многія нацыянальныя каманды па розных відах спорту. Не толькі з прычынаў актыўнага кавіднага перыяду, які зацягнуўся са з’яўленнем штаму о-мікрон. Траўмы ў падрыхтоўчы перыяд, проста прастудныя інфекцыйныя захворванні або, напрыклад, з’яўленне дадатковай квоты. Так здарылася і з трэцім допускам на Алімпіяду ў беларускай камандзе фрыстайлістаў, дакладней, фрыстайлістак.
Міжнародная лыжная федэрацыя пералічыла і аднавіла рэйтынг, пасля чаго Беларусі вылучылі яшчэ адну квоту ў лыжнай акрабатыцы. Такім чынам, да Ганны Гуськовай і Ганны Дзяругі далучыцца Настасся Андрыянава. Ёй толькі 17 гадоў. Дзяўчына сёлета другі сезон стартавала ў Кубку свету і адразу паказала свой найвышэйшы вынік. На дэбютным этапе Кубка планеты, што прыняла фінская Рука, Настасся заняла 9-е месца.
Такім чынам, склад беларускіх спартоўцаў на Пекін-2022 пашырыўся да 29 спартоўцаў.
Яшчэ адно змяненне датычыць біятлону. Замест расяянкі Ірыны Кручынкінай у склад жаночай зборнай увойдзе беларуска Аліна Пільчук. 21-гадовая жодзінская спартоўка толькі сёлета дэбютавала ў складзе нацыянальнай каманды і прабегла чатыры гонкі на пятым і шостым этапах Кубка планеты ў нямецкіх Обэргофе і Рупальдынгу: два спрынты, пераслед і індывідуальны старт. Найвышэйшае месца – 40-е. Першыя спартоўцы зборнай Беларусі – ужо на шляху ў Пекін. Хтосьці ляціць у кітайскую сталіцу з Мюнхену, хтосьці будзе дабірацца рэйсам з Менску праз Стамбул. Але аэрапорт найбуйнейшага гораду Турцыі пакуль не прымае самалётаў з прычыны снегападу.
Ужо на гэтым тыдні будуць адбывацца першыя тэсты чальцоў беларускай дэлегацыі і засяленне ў алімпійскія вёскі.
Аляксандр Пуціла, belsat.eu