Учора, 23 кастрычніка, польскімі памежнікамі былі зафіксаваныя 457 спробаў незаконнага перасячэння беларуска-польскай мяжы, паведамляе Польская памежная ахова.
Былі затрыманыя 4 іншаземца: 2 грамадзяніна Іраку і 2 – Сірыі, астатніх вярнулі назад.
Памежная ахова Польшчы паведамляе, што толькі ў кастрычніку гэтага года было перадухілена больш за 12,8 тысяч спроб незаконнага перасячэння беларуска-польскай мяжы.
Між тым агенцыя ААН па справах уцекачоў заклікае да неадкладных дзеянняў па ўратаванні жыццяў і перадухіленні далейшых цярпенняў у памежных раёнах паміж Беларуссю і Еўразвязам: Латвіяй, Літвой Польшчай, пасля чарговай смерці мігранта на мяжы.
На днях польскія ўлады заявілі, што адправяць трэці ўрадавы канвой з дапамогай для мігрантаў на тэрыторыю Беларусі.
«Сярод асартыменту знойдзецца 412 палявых ложкаў, 600 коўдраў і тры палаткі з абсталяваннем. Акрамя таго, Польшча перадасць сродкі індывідуальнай абароны: ахоўныя маскі і пальчаткі», – гаворыцца ў паведамленні.
Нагадваем, раней польскія ўлады двойчы спрабавалі даставіць гуманітарную дапамогу мігрантам. Беларускія ўлады не пускалі грузавікі з дапамогай у краіну.
АД, belsat.eu
