Генеральная дырэктарка ўкраінскага ўрадавага офісу каардынацыі еўрапейскай і еўраатлантычнай інтэграцыі Наталля Фарсюк заявіла, што чаканы тэрмін уступлення Украіны ў Еўрапейскі Звяз – 2029 год.
Наталля Фарсюк не бачыць перашкодаў для сяброўства Украіны ў ЕЗ, але патлумачыла, што працэдура будзе працяглай, у прыватнасці трэба выканаць рэкамендацыі Еўракамісіі, але па ўсіх умовах у Украіны ёсць прагрэс – іх трэба выканаць, а не пачынаць нешта нанова.
«Раней – малаверагодна праз тую вялікую колькасць заканадаўства, што трэба прыняць ды імплементаваць. Мы павінны жыць паводле еўрапейскіх законаў», – сказала Фарсюк.
Пачаць перамоўныя працэдуры пра чалецтва Украіны ў ЕЗ плануюць у пачатку наступнага года, а набыццё Украінаю статусу кандыдата ў сябры Еўразвязу юрыдычна замацоўвае еўрапейскую перспектыву і адкрывае доступ да структурных фондаў.
«Доступ да сродкаў гэтых фондаў маюць толькі краіны – кандыдаты ў чальцы ЕЗ, грошы даюцца на ільготных умовах практычна бясплатна… Статус кандыдата ўзмоцніць пазіцыю Украіны ў мірных перамовах», – заявіла Фарсюк.
Учора, 23 чэрвеня, Рада Еўропы падтрымала наданне Украіне і Малдове статусу кандыдатаў на ўступленне ў Еўразвяз.
Алена Рувіна belsat.eu
