Новую крымінальную справу супраць няпоўнагадовага Мікіты Залатарова перадалі пракурору для накіравання ў суд.
17-гадовага палітычнага вязня вінавацяць у нападзе на супрацоўніка СІЗА № 3 паводле арт. 364 КК. Паводле матэрыялаў справы, Мікіта «наўмысна зрабіў падножку супрацоўніку Лучкіну, у выніку чаго той упаў на падлогу, а калі падняўся, то прыхіліў Мікіту да сцяны, але падлетак схапіў Лучкіна за валасы і шыю, прычыніўшы фізічны боль і пабоі пацярпеламу, а таксама выказаў пагрозу ўжыць гвалт над супрацоўніцаю Хаўбок і ейнымі блізкімі».
«Я лічу, што гэта адмысловая правакацыя. Мой сын хворы на эпілепсію. Яны адмыслова не давалі яму лекаў, у яго з’яўляецца раздражнёнасць. Ён мусіць не сядзець у турме, а лекавацца ў шпіталі. У іх там ёсць нейкі кабінет псіхолага, але ўсё гэта бздура, каб галачку на паперы паставіць. Але што там адбываецца насамрэч, ніхто не ведае», – распавёў Міхаіл Лапуноў, бацька Мікіты.
Паводле спадара Міхаіла, ахоўнікі пачалі выцягваць Мікіту за рукі з камеры, хлопец мог за нешта схапіцца ці выпадкова нешта зрабіць: «Ён важыць 50 кілаграмаў, якую шкоду ён мог прычыніць? Можа, калі яго валаклі, нага некуды і патрапіла. Але сутнасць у тым, што ён палітычны, і гэта яўная замова зверху: ціснуць на ўсіх, хто мае палітычны статус, хто хоць неяк рот адкрыў, што ён супраць. Усіх ціснуць да канца».
Міхаіл Лапуноў падкрэсліў, што такое стаўленне да падлетка – за мяжою чалавечнасці:
«Я не ведаю, пра што яны там думаюць, так здзекавацца з хлопца. Яны ж і паперы пастаянна дадому дасылаюць, і паўсюль ставяць свае подпісы ды прозвішчы. Гэтыя людзі жывуць з намі ў адным горадзе, у адным доме! Гэтыя дакументы будуць для гісторыі. Калі ўлада памяняецца і будзе нармальная дэмакратычная краіна, усе адкажуць».
22 лютага ў гомельскім судзе Мікіту прызначылі 5 гадоў у выхаваўчай калоніі паводле крымінальнай справы аб кактэйлях Молатава. Хлопец віны не прызнаў, а пасля прысуду ў яго здарылася істэрыка: ён кідаўся на краты і прасіў яго выпусціць.
Мікіта Залатароў – падлетак, хворы на эпілепсію. Хлопец неаднаразова скардзіўся бацьку на жорсткае збіццё – ужывалі нават электрашокер. Таксама Мікіта заявіў у судзе, што яму ў СІЗА не даюць таблетак: «Канваір сказаў, што я палітычны і тут здохну».
МГМ, belsat.eu