82 % грамадзянаў Украіны не гатовыя ахвяраваць тэрыторыяй краіны дзеля міру з Расеяй
Паводле звестак Кіеўскага міжнароднага інстытуту сацыялогіі, апублікаваных 24 траўня, для 82 % украінцаў якія-кольвек тэрытарыяльныя саступкі дзеля міру з Расеяй недапушчальныя.
Толькі 10 % лічаць, што для дасягнення міру можна ахвяраваць часткаю краіны. Астатнія 8 % не гатовыя адказаць.
Пры гэтым нават на ўсходзе Украіны, дзе трываюць інтэнсіўныя баявыя дзеянні, 68 % асобаў супраць уступак, а гатовыя на іх толькі 19 %. На поўдні супраць страты тэрыторыяў выступаюць 83 %, згодныя з гэтым 9 %.
У рэгіёнах, якія кантралююцца расейскім войскам (Херсонская і частка Запарожскай вобласці) 77 % жыхароў супраць саступак тэрыторыяў. Маглі б іх падтрымаць толькі 5 %.
Пра гэта сведчаць вынікі апытання Кіеўскага міжнароднага інстытуту сацыялогіі, праведзенага 13–18 траўня. Апытанне праводзілася праз тэлефон, агулам былі апытаныя 2000 чалавек. Не ўзялі ўдзелу толькі жыхары Крыму і Севастопалю, а таксама грамадзяне, якія жывуць на тэрыторыях, якія кантралююцца так званымі ДНР і ЛНР.
Алена Рувіна belsat.eu
