Дарадца Святланы Ціханоўскай Франак Вячорка заявіў у жывым эфіры студыі «Белсату», што функцыю прэзідэнта Беларусі трэба пераймаць Ціханоўскай, бо «Лукашэнка самаўхіліўся».
«Мы ўзгадняем легальныя, праўныя дзеянні. Паколькі Лукашэнка самаўхіліўся ад сваёй асноўнай функцыі – абароны тэрытарыяльнай цэласнасці і суверэнітэту краіны, – магчыма, гэтую функцыю трэба пераймаць Святлане Ціханоўскай», – сказаў Франак Вячорка.
Паводле Вячоркі, кансультацыі ў гэтым пытанні ўжо праведзеныя 24 лютага з прадстаўнікамі Еўразвязу, ЗША, Літвы, Польшчы і Францыі.
«Заўтра раніцаю плануецца сустрэча з міністрам замежных справаў Францыі. І гэта будзе сустрэча вельмі практычная: хто будзе прадстаўляць Беларусь? І калі гэта Ціханоўская, то якім чынам гэта будзе абазначана юрыдычна», – паведаміў прадстаўнік Святланы Ціханоўскай.
25 лютага Святлана Ціханоўская выступіць перад прадстаўнікамі сенату і парламенту ўсіх краінаў Еўразвязу.
Вячорка таксама распавёў, што даходзяць сігналы з боку беларускага генералітэту, які аказаўся абсалютна не падрыхтаваным да атакі на Украіну.
«Іх падманвалі і казалі, што Беларусь не пойдзе на Украіну, а цяпер уцягваюць у вайну. І таму гэта момант пералому, момант расколу, з якога мы мусім скарыстацца», – заявіў Франак Вячорка.
Паводле прадстаўніка Святланы Ціханоўскай, лёс Беларусі вызначаецца найбліжэйшымі гадзінамі.
Вячорка таксама паведаміў, што для беларусаў, якія цяпер ва Украіне, арганізуюць гуманітарны калідор.
ЗК belsat.eu