Сілавікі атрымалі доступ да базаў «Еўраопту». Кіраўнік «BYSOL» – пра атаку на сваякоў палітвязняў
Паводле праваабаронцаў «Вясны», 23 студзеня пад пераслед сілавікоў трапілі прынамсі 84 асобы. Не менш за 37 былі затрыманыя. Рэпрэсіі закранулі сваякоў палітзняволеных. Кіраўнік фонду «BYSOL» Андрэй Стрыжак у эфіры «Белсату» назваў новую хвалю пераследу атакаю на ўсю сістэму дапамогі палітвязням.
Кіраўнік «BYSOL» Андрэй Стрыжак адзначыў, што, апроч ператрусаў у сваякоў палітвязняў, магутную атаку зазнаў сайт фонду, аб праблемах заявілі іншыя арганізацыі, што дапамагаюць людзям, якія цяпер за кратамі з палітычных прычынаў.
«Гэта комплексная атака на ўсю сістэму дапамогі», – упэўнены праваабаронца.
Стрыжак не сумняваецца, што неабходныя звесткі сілавікам даў рэтэйлер «Еўраопт»: менавіта яго сэрвісам даставы карысталіся актывісты, каб дапамагаць з харчамі родным рэпрэсаваных.
«Асабліва варта закрануць тое, як у гэта ўцягнуты калядзяржаўны бізнес, у прыватнасці, «Еўраопт». Арганізацыя «INeedHelpBy», што дапамагае беларусам, ладзіла даставу больш чым 16 тысячам сем’яў, якія пацярпелі падчас пратэстаў і далейшых рэпрэсіяў, і карысталася сэрвісам «е-доставка». Выглядае, што сілавікі атрымалі доступ да базаў «Еўраопту» і паводле гэтых базаў «працавалі». Шмат асобаў, да якіх учора прыйшлі, казалі пра тое, што цікавіліся не толькі сувяззю з «BYSOL», а ў тым ліку гэтымі харчовымі наборамі», – апавёў Андрэй Стрыжак.
Ён звярнуў увагу, што ініцыятывы «INeedHelpBy» доўгі час у Беларусі не чапалі. Толькі напярэдадні арганізацыю прызналі «экстрэмісцкім фармаваннем» – і адразу пачалася атака: «Гэта паказвае, што рыхтаваліся загадзя, даўно, і цяпер розныя сілавыя структуры каардынуюцца паміж сабою».
Кіраўнік «BYSOL» звязаў узмацненне рэпрэсіяў з выбарамі, што плануюцца ў Беларусі:
«Лукашысты паспрабуюць даказаць сабе, што яны перамаглі на тых выбарах 2020 года, што яны дасюль кантралююць сітуацыю ў краіне, а самае галоўнае – кантралююць тое, што адбываецца ў галовах людзей, што, безумоўна, няпраўда, бо людзі незадаволеныя цяперашняй уладаю і супраціўляюцца, як толькі могуць. Звычайна гэта нейкія падпольныя дзеянні, аднак улада гэта выдатна бачыць».
Стрыжак заклікаў сваякоў палітвязняў разважліва ацэньваць рызыкі і не выключаць варыянту эміграцыі, калі «багата эпізодаў атрымання дапамогі, ёсць факты актыўнасці»:
«Гэта адна з самых складаных сітуацыяў, адно з самых цяжкіх рашэнняў. Аднак варта падумаць пра тое, ці будзе лягчэй вашым родным, калі вы самі трапіце за краты, і ці будзе лягчэй вашай сям’і, калі ў ёй будзе на аднаго палітвязня больш».
Сцяпан Кубік belsat.eu
