Начальнік Генеральнага штабу Узброеных сіл Беларусі Віктар Гулевіч паведаміў пра тое, што нашая краіна згортвае супрацу з NATO. Акрамя таго, вайсковец абвінаваціў краіны Захаду ў стварэнні міграцыйнага крызісу на беларускай мяжы.
Начальнік Генеральнага штабу Узброеных сіл Беларусі, першы намеснік міністра абароны Віктар Гулевіч выступіў з заявай, у якой папярэдзіў пра «гатовасць рэагаваць на ўзмацненне вайсковай актыўнасці на вонкавым контуры дзяржаўнай мяжы Рэспублікі Беларусь».
Існую сітуацыю вайсковец назваў «складанай на фоне сацыяльна-палітычнай абстаноўкі». Віктар Гулевіч таксама заявіў пра згортванне супрацы з NATO.
«Больш за тое, літаральна на днях быў зроблены чарговы недружалюбны крок з боку еўрапейскіх дзяржаваў. На ініцыятыву NATO быў згорнуты яшчэ адзін канал дыялогу і прыпыненая практычная супраца Паўночнаатлантычнага альянсу з Рэспублікай Беларусь», – сказаў Віктар Гулевіч.
Прадстаўнік Мінабароны лічыць, што вакол Беларусі фармуецца «пояс недружалюбных дзяржаваў».
«Парушаюцца ўсе міжнародныя дамоўленасці ў пытаннях бяспекі і транспарэнтнасці вайсковай дзейнасці. Зневажаюцца палажэнні Венскага дакументу аб захадах умацавання даверу. Мы прапаноўвалі польскаму боку двухбаковую сустрэчу спецыялістаў для назірання за вайсковай дзейнасцю. Але прапановы, якія дазволілі б зняць напружанасць, пакуль не знайшлі чаканай падтрымкі», – наракае беларускае Міністэрства абароны.
Афіцыйны Менск «насцярожваецца», што нібыта адбываецца «непрыхаваная мілітарызацыя грамадскай свядомасці ў суседніх краінах».
СК belsat.eu
