Міністэрства абароны Расеі 23 ліпеня прызнала, што ўночы абстраляла ракетамі ўкраінскую Адэсу. Але пры гэтым адмовілася ўзяць на сябе адказнасць за траплянне ракеты ў Спаса-Праабражэнскі сабор УПЦ.
Паводле Мінабароны РФ, падчас атакі былі знішчаныя «аб’екты, дзе кіеўскім рэжымам сумесна з замежнымі спецыялістамі рыхтаваліся тэрарыстычныя акты супраць Расейскай Федэрацыі, размяшчаліся на бяспечнай дыстанцыі ад храмавага комплексу». А Расея нібыта плануе свае ўдары «высокадакладнай зброяй» «на падставе старанна праверанай і пацверджанай па некалькіх каналах інфармацыі».
«Непісьменнымі» ж у Мінабароны РФ назвалі дзеянні ўкраінскай СПА, у выніку чаго нібыта і мог быць разбураны сабор.
У ЗСУ адзначылі, што 23 ліпеня Расея выпусціла па Адэсе 19 ракетаў розных тыпаў з тэрыторыі Крыму і акваторыі Чорнага мора. З іх збіць атрымалася толькі дзевяць.
У выніку начной атакі на Адэсу былі параненыя 19 асобаў, адзін чалавек загінуў. Разбураныя шэсць жылых, у тым ліку шматкватэрных дамоў. Пашкоджаныя два помнікі архітэктуры і праваслаўны кафедральны сабор.
Прэзідэнт Украіны Уладзімір Зяленскі заявіў, што «ніякага апраўдання расейскаму злу быць не можа».
Якуб Хруст belsat.eu