Звальненне амбасадара Украіны звязанае з планамі размясціць у Беларусі расейскую ядравую зброю, заявіў у каментары «Белсату» украінскі палітолаг Яўген Магда. Ён адзначыў, што новы пасол будзе ўручаць даверчыя граматы толькі новаму прэзідэнту Беларусі.
Адстаўку амбасадара Украіны ў Менску ўкраінскі палітолаг Яўген Магда назваў адказам на планы размясціць у Беларусі расейскую ядравую зброю. Пра гэта ён заявіў «Белсату», каментуючы рашэнне прэзідэнта Уладзіміра Зяленскага вызваліць Ігара Кізіма з пасады пасла:
«Звальненне ўкраінскага пасла – гэта не выпадковы жэст. Ён ужо колькі месяцаў знаходзіўся ў Кіеве на кансультацыях пасля таго, як Лукашэнка прыняў Пушыліна ў Менску. Гэты жэст насамрэч звязаны з тым, што Беларусь гатуецца размясціць на сваёй тэрыторыі ядравую зброю».
Магда падкрэсліў, што дыпламатычныя адносіны паміж дзвюма краінамі застаюцца, хаця ўзровень гэтых зносінаў цяпер паменшаны.
«Не выключаю, што будзе іншы дыпламат часова павераным у справах, але ён не будзе ўручаць даверчыя граматы Лукашэнку. Паколькі Лукашэнку Кіеў палітычна не прызнае, то новы пасол Украіны будзе ўручаць даверчыя граматы толькі новаму прэзідэнту Беларусі», – сказаў эксперт.
Ён растлумачыў, што Кіеў не хоча закрываць амбасаду ў Менску дзеля сваіх грамадзянаў: праз Беларусь трывае абмен ваеннапалоннымі, акрамя таго, праз Беларусь украінцы вяртаюцца на радзіму з Еўропы.
«Беларусь пагадзілася іх прапускаць праз адзіны пункт на мяжы з Валынскай вобласцю з мінімальнымі дакументамі, фактычна з пропускам у басейн, умоўна кажучы, абы фота было. Дзясяткі тысячаў грамадзянаў Украіны цяпер у Беларусі. Калі зараз разарваць дыпламатычныя зносіны, гэтыя грамадзяне даволі хутка стануць грамадзянамі Беларусі. Да іх проста прыйдуць і скажуць хутка змяніць грамадзянства, бо няма каму за іх уступіцца», – заўважыў палітолаг.
Суразмоўца «Белсату» таксама пракаментаваў праект пастановы Вярхоўнай Рады аб прызнанні Беларусі краінай-агрэсарам. Кажа, што, нават калі дакумент ухваляць, да разрыву дыпламатычных адносінаў гэта не прывядзе.
«Вонкавай палітыкаю краіны кіруе прэзідэнт Украіны. І няма наўпроставай карэляцыі паміж такой пастановаю і тым, што будуць разарваныя дыпламатычныя адносіны. Прэзідэнт можа іх разарваць без пастановы парламента. А пастанова парламента будзе не абавязковай для выканання прэзідэнтам», – адзначыў Яўген Магда.
22 чэрвеня Зяленскі падпісаў указ аб звальненні Кізіма з пасады пасла ў Беларусі. З сакавіка дыпламат знаходзіўся ў Кіеве. Тады Кізіма адклікалі на кансультацыі пасля перамоваў у Менску Лукашэнкі з кіраўніком гэтак званай ДНР Дзянісам Пушыліным.