Акадэмія навук Беларусі задумала стварыць галасавы памочнік, як «Siri». Прыдумалі імя: «Алеся»
На выставе «Tibo» дырэктар Інстытуту праблемаў інфарматыкі расказаў, што да канца года чакае стварэння тэставай версіі беларускага галасавога асістэнта, падобнага да «Алісы» расейскага «Яндэкса». Ягоныя словы перадае дзяржаўны тэлеканал «СТВ».
Генеральны дырэктар Аб’яднанага інстытуту праблем інфарматыкі Нацыянальнай акадэміі навук Беларусі Сяргей Круглікаў расказаў, што ў Беларусі з’явіцца «аналаг Алісы» – тая ў сваю чаргу з’яўляецца расейскім аналагам амерыканскіх распрацовак: «Siri», якую інтэгравала ў сваю тэхніку «Apple», «Cortana» ад «Microsoft» і «Google Assistant».
Круглікаў расказаў няшмат падрабязнасцяў аб праекце: толькі тое, што праграме прыдумалі імя «Алеся» і што першую версію чакаюць да канца года.
«Мы цяпер фармуем свой кол-цэнтр, хочам, каб гэтая рэч была апрабаваная ў нашым кол-цэнтры па суправаджэнні пэўных праграмных прадуктаў», – таксама сказаў ён.
Ці збіраюцца інтэграваць «Алесю» ў нешта акрамя кол-цэнтру, як то ў «беларускі» ноўтбук ці аўтамабілі беларускай зборкі, невядома.
У тэлефоннай падтрымцы на самой справе выкарыстоўваюць больш простую тэхналогію: інтэрактыўнае галасавое меню або IVR. У гэтай сістэме аўтаадказнік зачытвае папярэдне запісаную інструкцыю і просіць выбраць наступны запіс у залежнасці ад сітуацыі або пераключыцца на размову з жывым чалавекам («Калі зламалася А, націсніце 1, калі не працуе Б, націсніце 2… Для сувязі з чалавекам націсніце 0»).
Расейская «Аліса», таксама як «Siri» і іншыя, насамрэч прызначаная не для кол-цэнтраў: яе выкарыстоўваюць у тэлефонах і персанальных камп’ютарах для кіравання тэхнікай голасам і для галасавых пошукавых запытаў. Асноўныя «фішкі» такіх памочнікаў – распазнаванне голасу і генерацыя галасавога адказу з улікам звестак аб карыстальніку, што праграма сабрала раней (напрыклад, на пытанне аб надвор’і праграма адкажа па змаўчанні аб надвор’і ў месцы, дзе знаходзіцца апарат, з якога паступіў запыт, а на просьбу патэлефанаваць «майму брату» набярэ нумар, які запісаны ў карыстальніка як «брат»).
Для кол-цэнтраў даўно спрабуюць стварыць нешта падобнае да галасавых асістэнтаў, але магчымасці інтэрактыўнага галасавога меню ўсё яшчэ абмежаваныя загадзя падрыхтаванымі сцэнарамі.
Імаверна, у бліжэйшы час у галасавыя памочнікі інтэгруюць моўныя мадэлі кшталту «ChatGPT», якія змогуць даваць яшчэ больш натуральныя адказы. Свае тэкставыя чат-боты з такім штучным інтэлектам ужо маюць «Microsoft» (бот якога валодае беларускай мовай) і «Google», над такой працуе «Яндэкс».
Алесь Наваборскі belsat.eu
