Аўстрыйская кампанія «A1 Telekom Austria Group», якой належыць беларускі мабільны аператар «А1» пастанавіла не сыходзіць з Беларусі. Пра гэта піша аўстрыйскі «Kurier».
Беларускі аператар «A1» ёсць для «A1 Telekom Austria Group» адной з самых прыбытковых кампаніяў, на яго прыпадае 16 % аперацыйнага прыбытку групы. Паводле «Kurier», мексіканскі мажарытарны ўладальнік «América Móvil» галасаваў за выхад з Беларусі, але супраць выступілі прадстаўнікі прафсаюзу і аўстрыйскай кампаніі. Яны баяцца, што сыход з Беларусі прывядзе да скарачэння працоўных месцаў у Аўстрыі. У выніку прынялі рашэнне заставацца.
Прэс-сакратар канцэрну Міхаэль Гёфлер пацвердзіў выданню, што «A1 Telekom Austria Group» не плануе выходзіць з Беларусі». Паводле яго, сыход ударыць толькі па насельніцтве і па 2300 працаўніках «A1» у Беларусі, але не па рэжыме. «A1» у Беларусі «робіць істотны ўклад у развіццё грамадзянскай супольнасці і ў забеспячэнне насельніцтва інтэрнэтам», паказвае, што на рынку «ёсць альтэрнатыва», дае жыхарам сувязь з Еўропай, а супрацоўнікам – доступ да міжнародных карʼерных лесвіцаў, заявіў Гёфлер.
ПС belsat.eu