Супрацоўнікі КДБ атрымалі новыя паўнамоцтвы. Цяпер яны змогуць складаць пратаколы і весці справы паводле некаторых артыкулаў Кодэксу аб адміністратыўных правапарушэннях. Адпаведную пастанову падпісаў кіраўнік КДБ Іван Церцель. Яна ўступіла ў моц.
Усяго КДБ дазволена судзіць больш як паводле 20 артыкулаў КаАП. Сярод іх ёсць «экстрэмісцкія», а яшчэ кадэбісты будуць сачыць за справаздачнасцю ІП. Вось некаторыя артыкулы, якія апынуліся пад асаблівым наглядам КДБ:
13.3 («Незаконная прадпрымальніцкая дзейнасць»);
19.11 («Распаўсюд, выраб, захоўванне, перавоз інфармацыйнай прадукцыі, якая змяшчае заклікі да экстрэмісцкай дзейнасці або прапагандуе такую дзейнасць»);
19.12 («Незаконны выраб і (або) распаўсюд методык альбо іншых матэрыялаў пра спосабы вырабу выбуховых прыладаў і выбуховых рэчываў»);
19.13 («Фінансаванне тэрарыстычнай дзейнасці»);
23.9 («Парушэнне патрабаванняў у выкарыстанні нацыянальнага сегменту сеткі інтэрнэт»);
24.11 («Ненаданне ўпаўнаважанай асобай або ІП дакументаў, справаздачаў і іншых матэрыялаў»);
25.5 («Адмова альбо ўхіленне сведкі або пацярпелага ад тлумачэнняў альбо эксперта або перакладчыка ад выканання ўскладзеных на іх абавязкаў»);
26.3 («Парушэнне абавязкаў у воінскім уліку»).
Раней стала вядома, што супрацоўнікам КДБ дазволяць выкарыстоўваць табельную зброю ў натоўпе.
Арсен Рудэнка belsat.eu
