Еўракамісар Ільва Югансан заявіла, што Еўропа не дапаможа Літве будаваць плот на мяжы з Беларуссю
Камісар па ўнутраных справах Еўрапейскай камісіі Ільва Югансан заявіла, што Еўропа не зможа дапамагчы Літве з фінансаваннем фізічнага бар’еру на мяжы з Беларуссю. Пра гэта Югансан заявіла падчас канферэнцыі «Кіраванне межамі», якая адбываецца ў Вільні, перадае lrt.lt.
«Фінансаванне плотаў і дротавых бар’ераў – гэта не наша пазіцыя», – цытуе словы еўракамісара ria.ru.
Ільва Югансан таксама заявіла, што ў выпадку неабходнасці будзе разгледжаная магчымасць іншай дапамогі Літве.
У сваю чаргу міністарка ўнутраных справаў Літвы Агне Білотайте падкрэсліла, што спакой, які на сёння трывае на мяжы Літвы з Беларуссю, падманлівы.
«Спакой, які вы назіраеце тут цяпер, падманлівы. Нашыя памежнікі гэта ведаюць. У кожны момант можа з’явіцца група мігрантаў, якую гвалтам выштурхоўваюць беларускія службовыя асобы.
Адмыслова падрыхтаваныя для гэтага групы мігрантаў таксама могуць спрабаваць ужываць гвалт», – сказала міністарка.
Канферэнцыя «Кіраванне межамі» распачала сваю працу ў Вільні 21 студзеня. У ёй бяруць удзел дэлегацыі 29 краінаў.
Раней Літва заяўляла, што да 1 верасня 2022 году цалкам адгародзіцца ад Беларусі плотам. Першая чарга будаўніцтва – 100 кіламетраў двухэлементнага бар’еру – пірамідаў з канцэрціны і плоту са спіральным дротам – мяркуюць скончыць да 30 красавіка 2022 года.
ЗК belsat.eu
