У сенат Польшчы паступіла пасылка на імя спікера Томаша Гродскага, у якой была ўзрыўчатка і пагрозы расправы. Аб гэтым спікер паведаміў на сваёй старонцы ў Twitter.
«Вось да чаго прыводзіць індустрыя пагарды і палітычных апанентаў. На маё імя ў Сенат прыйшла пасылка – ліст з пагрозамі расправы і выбухоўкай. Пасылку забралі адпаведныя службы. Я спадзяюся, яны хутка зладзяцца са злачынцам!» – напісаў ён.
Польская радыёстанцыя RMF паведаміла, што ўнутры было 10 грамаў парашка нітрацэлюлозы – пораху, які выкарыстоўваецца ў агнястрэльнай зброі.
Адпраўнік падпісаўся «лясным вартаўніком».
У пасылцы ўтрымліваліся пагрозы і іншым польскім палітыкам – лідару апазіцыйнай «Грамадзянскай платформы» Дональду Туску і дэпутату сейма ад партыі Туска Дарыюшу Йонскі.
АД, belsat.eu
