Закон аб крымінальным пераследзе памерлых апублікаваны на Нацыянальным прававым інтэрнэт-партале
На Нацыянальным прававым інтэрнэт-партале 21 ліпеня з’явіўся закон № 286-3 ад 17 ліпеня аб магчымасці крымінальнага пераследу памерлых. Гэтым законам уносяцца змяненні ў Крымінальны кодэкс Беларусі.
Прысуды памерлым будуць выносіць паводле артыкулаў, да якіх у Беларусі не прымяняюцца тэрміны даўніны – гэта датычыць злачынстваў супраць міру, бяспекі чалавецтва і ваенных злачынстваў. Судзіць памерлых змогуць паводле наступных артыкулаў КК РБ:
- «Рыхтаванне альбо вядзенне агрэсіўнай вайны» (арт. 122);
- «Акт міжнароднага тэрарызму» (арт. 126);
- «Генацыд» (арт. 127);
- «Злачынствы супраць бяспекі чалавецтва» (арт. 128);
- «Вытворчасць, назапашванне альбо распаўсюд забароненых сродкаў вядзення вайны» (арт. 129);
- «Прымяненне зброі масавага паражэння» (арт. 134);
- «Парушэнне законаў і звычаяў вайны» (арт. 135);
- «Злачынныя парушэнні нормаў міжнароднага права ў час узброеных канфліктаў» (арт. 136);
- «Бяздзеянне альбо вынясенне злачыннага загаду падчас узброенага канфлікту» (арт. 137).
Закон рэгламентуе асаблівасці рэпрэзентавання інтарэсаў памерлага, удзел адваката ў працэсе. Рэпрэзентаваць інтарэсы памерлага ў судзе змогуць ягоныя сваякі.
Генеральны пракурор Беларусі Андрэй Швед зазначаў, што новы закон будзе ўжывацца ў справе аб генацыдзе беларусаў падчас Вялікай Айчыннай вайны.
Закон уступіць у моц праз 10 дзён пасля афіцыйнай публікацыі – 31 ліпеня 2023 года.
Марыя Міхалевіч belsat.eu
