З апошняга ліста Ігара Лосіка да родных цэнзар пакінуў пустую паштоўку і малюнак
Ігар Лосік працягвае знаёмства са сваёй справай, распавяла ў жывым эфіры «Белсату» жонка палітзняволенага Дарʼя Лосік. За кратамі ён знаходзіцца ўжо 300 дзён.
Дата суду ў справе Ігара Лосіка ўсцяж не вядомая, ён вывучае матэрыялы сваёй крымінальнай справы.
«Ён мог некалькі месяцаў проста сядзець у турме, яму працягвалі тэрмін знаходжання пад вартай, але ніякіх следчых дзеянняў фактычна не было», – кажа Дарʼя Лосік.
20 красавіка Тэлеграм-канал «Беларусь галоўнага мозгу», які стварыў Ігар Лосік прызналі экстрэмісцкім. Але пакуль родныя не маюць інфармацыі ці гэта неяк паўплывала на справу Ігара. Больш за тое, з апошняга ліста Ігара да сваіх родных цэнзура не прапусціла інфармацыю.
«Я атрымала лісты ад яго, але цэнзар пакінуў толькі пустую паштоўку і малюнак ад Ігара, таму я не магу сказаць, пра што пісаў мне Ігар», – кажа Дарʼя Лосік.
Ігар Лосік застаецца за кратамі ўжо 300 дзён.
- Ігару Лосіку 28 гадоў. Нарадзіўся і вырас у Баранавічах. Скончыў Баранавіцкі дзяржаўны ўніверсітэт па спецыяльнасці «настаўнік замежных моваў». Быў адміністратарам тэлеграм-каналу «Беларусь головного мозга».
- Ігара затрымалі 25 чэрвеня ва ўласным доме пасля ператрусу. Завялі крымінальную справу паводле арт. 342 КК РБ: «Удзел у дзеяннях, якія груба парушаюць грамадскі парадак». Маладзёна ўтрымлівалі пад вартай у СІЗА № 1 у Менску, 18 жніўня перавезлі ў Следчую турму ў Жодзіна.
- 15 снежня Лосіку выставілі абвінавачанне паводле ч. 2 арт. 293 Крымінальнага кодэксу: «Рыхтаванне да ўдзелу ў масавых беспарадках». 11 сакавіка стала вядома пра новае абвінавачванне, падрабязнасці якога пакуль не агучваюцца.
- Беларускія праваабаронцы прызналі Ігара палітвязнем.
Даслаць ліст яму можна па адрасе:
Следчая турма №8, вул. Савецкая, д. 22А г. Жодзіна 222163, Лосіку Ігару Аляксандравічу
АА belsat.eu
