Былы прэзідэнт ЗША Доналд Трамп не можа браць удзелу ў першасных выбарах у Каларада праз ролю ў нападзе сваіх прыхільнікаў на Капітолій 6 студзеня 2021 года. Пра гэта 19 снежня пастанавіў Найвышэйшы суд штату, піша «Reuters».
Рашэнне суда робіць Доналда Трампа першым кандыдатам на прэзідэнта, якому забаранілі ўдзел у выбарах згодна з раздзелам 3 у 14-й канстытуцыйнай папраўцы ЗША, што забараняе займаць пасады чыноўнікам, якія бяруць удзел у «паўстанні ці мяцяжы». Папраўку прынялі ў 1868 годзе пасля грамадзянскай вайны ў ЗША, каб не дапусціць прыхільнікаў Канфедэрацыі да працы ва ўрадзе.
Рашэнне датычыць толькі праймерыз Рэспубліканскай партыі ў Каларада 5 сакавіка 2024 года, але яно можа паўплываць на статус Трампа ў штаце і на ўсеагульных выбарах 5 лістапада. Таксама дакумент можа стацца падставаю для далейшых разбораў у Вярхоўным Судзе.
Пастанова набудзе моц не раней за 4 студзеня, пакуль жа ў Трампа ёсць магчымасць падаць апеляцыю. Перадвыбарчы штаб Трампа назваў рашэнне суда «недэмакратычным» і «памылковым».
Пазоў быў ініцыяваны групаю выбарнікаў Каларада пры падтрыманні праваабарончай групы «Грамадзяне за адказнасць і этыку» ў Вашынгтоне, якая сцвярджала, што Трампа варта дыскваліфікаваць за падбухторванне сваіх прыхільнікаў да нападу на Капітолій у няўдалай спробе перашкодзіць перадачы прэзідэнцкай улады Джо Байдэну пасля выбараў 2020 года. Адвакаты Трампа сцвярджалі, што ягоная прамова перад прыхільнікамі ў дзень закалотаў была абароненая ягоным правам на свабоду слова. А канстытуцыйная папраўка, паводле іх, не распаўсюджваецца на прэзідэнтаў ЗША.
Супраць Трампа, які цяпер ізноў збіраецца балатавацца на пасаду кіраўніка краіны, завялі ўжо некалькі крымінальных справаў. Яго абвінавацілі ў змове з мэтай адмяніць вынікі прэзідэнцкіх выбараў 2020 года, у незаконным утрыманні сакрэтных дакументаў, у фальсіфікацыі справаздачнасці для ўтойвання выплаты грошай за маўчанне порназоркі і за спробу адмяніць паразу на выбарах 2020 года ў штаце Джорджыя.
1 снежня два федэральныя суды пастанавілі, што Трамп не мае абсалютнага імунітэту ад грамадзянскага ці крымінальнага пераследу за свае спробы застацца ва ўладзе пасля выбараў 2020 года.
Якуб Хруст belsat.eu
