Еўрапейская камісія дазволіла да выкарыстання на тэрыторыі Еўразвяза амерыканскую вакцыну «Nuvaxovid».
Гэта пятая вакцына, рэкамендаваная ў ЕЗ для прадухілення COVID-19. Раней былі адобраны вакцыны «Moderna», «Pfizer», «Astra Zeneca» і «Johnson & Johnson».
Еўрапейскае агенцтва лекавых сродкаў (EMA) рэкамендавала прадаставіць часовы дазвол на продаж вакцыны супраць каронавіруса «Nuvaxovid» амерыканскай кампаніі «Novavax». Камітэт EMA па леках для чалавека прыйшоў да высновы, што дадзеныя аб вакцыне надзейныя і адпавядаюць крытэрам ЕЗ па эфектыўнасці, бяспецы і якасці. Вакцына прызначана для людзей ва ўзросце ад 18 гадоў.
Па выніках двух даследаванняў, у якіх прынялі ўдзел больш за 45 000 чалавек з Мексікі, ЗША і Вялікай Брытаніі, эфектыўнасць вакцыны складае каля 90%.
Пабочныя эфекты вакцыны эксперты назвалі лёгкімі або ўмеранымі, найбольш частыя з іх: слабасць, мышачныя і галаўныя болі, боль у месцы ін’екцыі і агульнае недамаганне.
АД, belsat.eu
