Прэзідэнт Еўрапейскай камісіі перасцерагла краіны ЕЗ ад вяртання да выкарыстання выкапнёвага паліва. Урзуля фон дэр Ляен заклікала павялічваць інвестыцыі ва аднаўляльную энергетыку ва ўмовах скарачэння паставак газу з РФ. Пра гэта палітык распавяла ў інтэрв’ю выданню Financial Times.
Брытанскае выданне паведамляе, што непазбежны рост спажывання вугалю, хаця і часовы, выклікаў занепакоенасць, што шэраг краін ЕЗ можа выкарыстоўваць энергетычны крызіс, каб адтэрмінаваць пераход да больш чыстых крыніц энергіі.
«Мы павінны пераканацца, што мы выкарыстоўваем гэты крызіс, каб рухацца наперад і не вяртацца ў бруднае выкапнёвае паліва», – заявіла Урзуля фон дэр Ляен.
ЕЗ, паводле слоў фон дэр Ляен, ужывае экстраныя захады, каб рэагаваць на пагрозу спынення паставак газу з Расеі, уключаючы меры па энергазберажэнні і вызначэнні галін, якія будуць атрымліваць газ паводле прыярытэту.
Еўрапейскае спажыванне газу ўжо скарацілася на 9% у першым квартале ў параўнанні з аналагічным перыядам у мінулым годзе. Гэта сталася, бо прамысловасць скарачае спажыванне газу ў адказ на амаль рэкордныя кошты. Прэзідэнт Еўракамісіі выказала меркаванне, калі спажыўцы аслабяць тэмпературу кандыцыянераў на 2°C, гэта можа прывесці да значных змяненняў у выкарыстанні газу.
«FT» паведамляе, што ў Еўразвязе спадзяюцца, што павелічэнне паставак газу з Ізраілю, Кіпру і Егіпту можа забяспечыць дадатковыя пастаўкі энерганосьбітаў для Еўропы. Фон дэр Ляен таксама адзначыла, што такія вытворцы, як Нарвегія і Азербайджан, павялічваюць свае аб’ёмы вытворчасці, каб даць ЕЗ альтэрнатыву расейскаму газу, які да поўнамаштабнага ўварвання РФ ва Украіну складаў 40 працэнтаў ад агульнага абʼёму ў Еўрапейскім Звязе.
Раман Лугоўскі belsat.eu