У гарадзенскай турме № 1 працягваецца судовы працэс над 12 беларусамі, якіх следчыя аб’ядналі ў так званую групу Аўтуховіча і вінавацяць у тэрарызме. Максім Сямёнаў, сябар палітзняволенага Міколы Аўтуховіча, распавёў «Белсату» ў жывым эфіры пра стаўленне да абвінавачвання.
Максім Сямёнаў паведаміў, што ягонае сяброўства з Аўтуховічам пачалося пасля папярэдняга палітычнага зняволення Міколы.
«Калі пачаліся акцыі ў 2020 годзе, мы бачыліся амаль кожны дзень і планавалі, як актывізаваць мясцовых прадпрымальнікаў для пратэстаў. Мы ўздымалі сцягі ўздоўж трасы Менск – Заслаўе. Ездзілі на маршы», – кажа Максім Сямёнаў.
Мужчына пракаментаваў дзяржаўнае абвінавачванне. Ён мяркуе, што Аўтуховіч ёсць дасведчаным вайскоўцам і не раз казаў, што малая група з некалькіх чалавек не можа супрацьстаяць аграмаднай сілавой машыне.
«Мікола – рамантык. Служыў у Афганістане добраахвотнікам. Пра сілавое ўздзеянне ён казаў толькі пра шырокія масы, якія б маглі бараніцца ад беззаконнікаў на маршах», – адзначыў Сямёнаў.
Мужчына дадаў, што Аўтуховіч меў вялікі аўтарытэт у Ваўкавыску. Паводле Максіма Сямёнава, Мікола быў своеасаблівым «айцом гораду» і меў павагу сярод прадпрымальнікаў. Ён шмат камунікаваў і выязджаў на рынкі. Казаў, што ёсць патэнцыял для зменаў. Паводле Сямёнава, Аўтуховіч не раз казаў, што цяпер не 1940 год, калі можна было хавацца са зброяй у лесе.
У той жа момант Сямёнаў дадаў, што ў 1990-я гады шмат якія бізнесоўцы мелі зброю, бо былыя спартоўцы і крымінальнікі тэрарызавалі бізнес.
«Былі сховішчы ў крымінальных бандаў, але цяпер шматлікія з іх перайшлі да сілавых структураў», – дадаў Сямёнаў.
Такім чынам, Максім Сямёнаў выказаў упэўненасць у абсурднасці дзяржаўнага абвінавачвання.
Раман Лугоўскі belsat.eu