Чарговая крымінальная справа была распачатая супраць заснавальніка тэлеграм-каналу «NEXTA» Сцяпана Пуцілы. Пуцілу і ягонага калегу Яна Рудзіка абвінавачваюць у кіраванні тэрарыстычнай арганізацыяй.
Галоўнае ўпраўленне ў расследаванні злачынстваў у сферы арганізаванай злачыннасці і карупцыі цэнтральнага апарату Следчага камітэту завяло крымінальную справу паводле арт. 290-5 ч. 1 КК РБ. СК абвінавачвае дзеячаў у арганізацыі і кіраванні дзейнасцю тэрарыстычнай арганізацыі «NEXTA».
Паводле следчых органаў, з 2020 года абвінавачаныя выкарыстоўвалі свае інфармацыйныя рэсурсы для дэстабілізацыі абстаноўкі на тэрыторыі Беларусі і радыкалізацыі акцыяў пратэсту.
«Тэрарысты неаднаразова заклікалі да распальвання сацыяльнай варожасці, блакавання дарог і каардынацыі вулічных беспарадкаў, учынення тэрактаў на чыгунцы і дыверсіяў на прадпрыемствах, якія маглі прывесці да тэхнагенных катастрофаў», – адзначылі ў СК.
Санкцыя гэтага артыкулу прадугледжвае пазбаўленне волі да 15 гадоў.
Нагадаем, што рашэннем Вярхоўнага Суда паводле заявы генеральнага пракурора «NEXTA» са структурнымі падраздзяленнямі «NEXTA Live» і «LUXTA» былі прызнаныя тэрарыстычнай арганізацыяй.
У Беларусі на Сцяпана Пуцілу заведзеныя крымінальныя справы яшчэ паводле 10 артыкулаў КК РБ.
Раман Лугоўскі belsat.eu