Марыупальская гарадская рада паведамляе, што частку жыхароў Левабярэжнага раёну Марыупалю гвалтоўна вывозяць у Расею ці на акупаваныя тэрыторыі Луганскай і Данецкай вобласцяў.
На 8-ю гадзіну раніцы 20 сакавіка ў Марыупальскай гарадской рады ёсць інфармацыя, што жыхароў вуліцаў Азоўстальскай і Украінскага казацтва Левабярэжнага раёну незаконна дэпартуюць на расейскую тэрыторыю. У людзей, якіх вывозяць, забіраюць украінскія пашпарты і выдаюць замест іх «паперку, якая не мае юрыдычнай вагі і не прызнаецца ва ўсім цывілізаваным свеце».
Расейскія войскі цягам амаль трох тыдняў трымаюць блакаду Марыупалю, пры гэтым бамбуюць і абстрэльваюць горад. Па гуманітарных калідорах да гэтага часу здолелі выехаць толькі некалькі тысяч марыупальцаў. Расейцы забараняюць падвозіць у горад гуманітарныя грузы.
19 сакавіка расейскія войскі скінулі бомбы на Школу мастацтваў у Марыупалі, дзе хаваліся 400 чалавек. Людзі застаюцца пад заваламі.
Раней, 16 сакавіка, расейскі самалёт скінуў бомбу на будынак тэатру ў Марыупалі, дзе хаваліся больш за тысячу чалавек. Тэатр быў цалкам знішчаны, аднак бамбасховішча вытрымала, людзі выжылі.
За час блакады ў Марыупалі загінулі больш за 2 тысячы чалавек. Дарадца мэра Марыупалю Пятро Андрушчанка заяўляў, што колькасць ахвяраў можа сягаць 20 тысячаў чалавек.
ГГ, belsat.eu