Ва Украіне перадалі Ўзброеным сілам 26 тысяч тон металічных вырабаў, сканфіскаваных у беларускага прадпрыемства. Гэтую маёмасць знайшлі на тэрыторыі марскога порта ў Адэсе, паведамляе Дзяржаўнае бюро расследаванняў.
Супрацоўнікі Дзяржаўнага бюро расследаванняў Украіны знайшлі 26 тысяч тон металічных вырабаў, што належаць беларускаму прадпрыемству, на тэрыторыі марскога порта. У паведамленні ведамства Беларусь названая краінай-агрэсарам:
«Дзяржаўнае бюро расследаванняў працягвае планамерную працу ў выяўленні і вяртанні на карысць нашай дзяржавы маёмасці краіны-агрэсара. У зоне мытнага кантролю Адэскай мытні былі выяўленыя арматура, трубы і сталёвыя нарыхтоўкі, якія належаць прадпрыемству з Рэспублікі Беларусь».
Партыю гэтых вырабаў ацанілі ў $61 млн. Якой кампаніі яны належалі, не ўдакладняецца, але на адным з фота Бюро бачны вытворца: Беларуская металургічная кампанія.
«Маёмасць краіны-агрэсара сканфіскаваная, а 412 вагонаў з металапрадукцыяй перададзеныя на патрэбы Узброеных сілаў Украіны. Актыўная дзейнасць Бюро працягваецца – маёмасць акупанта будзе выкарыстоўвацца для яго знішчэння», – заявілі ў ведамстве.
Гэта не першы такі выпадак: летась ва Украіне арыштавалі амаль 12 тысячаў тон угнаенняў «Беларуськалію» і «Уралкалію» на 100 мільёнаў грыўняў (каля $2,7 млн). У 2022 годзе паведамлялася пра канфіскацыю ў Валынскай вобласці 23 беларускіх цяжкавікоў з грузам, а таксама 60 адзінак тэхнікі беларускіх дарожна-будаўнічых прадпрыемстваў.
Сцяпан Кубік belsat.eu