Два з паловай гады ў Беларусі працягваюцца палітычныя рэпрэсіі. Амаль не бывае дня без навінаў пра новыя затрыманні, суды або катаванні палітвязняў. «Белсат» расказвае, што стала вядома за адзін дзень 19 лістапада.
У Маскоўскім судзе Берасця 16 і 18 лістапада разглядалі справу 29-гадовага мясцовага жыхара Антона Якавука, расказвае «Берасцейская Вясна». Яго вінавацілі ў «Абразе Лукашэнкі» (ч.1 арт. 368 КК РБ) за кароткае відэа ў сацсетках (stories) з Аляксандрам Лукашэнкам і адным абразлівым словам. Суддзя Марына Скалковіч пагадзілася з прапановай пракурора і прысудзіла Якавуку 1 год калоніі агульнага рэжыму. Праваабаронцы прызналі яго палітычным зняволеным.
Гэты артыкул 368 актыўна выкарыстоўваецца для палітычнага пераследу. У спісе «Вясны» больш за тры сотні асуджаных паводле гэтага артыкулу.
Агулам жа ў Беларусі ўжо 1450 чалавек прызнаныя палітычнымі зняволенымі: 19 лістапада праваабаронцы дадалі ў спіс яшчэ 23 чалавек, асуджаных пераважна за «абразы» Аляксандра Лукашэнкі, службовых асобаў і суддзяў.
Суд Ленінскага раёну Менску яшчэ 27 кастрычніка завершыў разгляд крымінальнай справы супраць мужа і жонкі Віталя Мацюша і Наталлі Ганапольскай, але пра вырак «Вясна» паведаміла толькі сёння. Суддзя Юлія Шчоткіна прызнала іх вінаватымі ў «Грубым парушэнні парадку» (ч.1 арт. 342 КК РБ) за ўдзел у мірным пратэсце супраць вынікаў выбараў 2020 года. Абодвум прысудзіла 3 гады абмежавання волі без накіравання ў папраўчую ўстанову (у народзе – «хатняя хімія»).
Паводле матэрыялаў справы, яны ў жніўні 2020 года падыходзілі да стэлы «Менск – горад-герой», дзе адбывалася акцыя пратэсту, дэманстравалі жэст «Вікторыя» і стужкі белага і чырвонага колеру (яны кажуць, стужкі павязалі на запясце), рухаліся з натоўпам па праезнай частцы (яны кажуць, выйшлі на перакрытую сілавікамі дарогу, каб сфатаграфавацца). Мацюша цалкам прызнаў віну і раскаяўся, падобныя паказанні дала Ганапольская.
Звязаны з сілавікамі Telegram-канал апублікаваў 19 лістапада «пакаяннае відэа» з чарговым затрыманым. Мужчына з «зацэнзураным» тварам заяўляе, што нібыта сам прыйшоў да сілавікоў, каб раскаяцца ва ўдзеле ў мірных пратэстах. Больш нічога пра сябе не расказвае, вызначыць асобу з відэа немагчыма.
Алесь Наваборскі belsat.eu