Стэндап-комік Ідрак Мірзалізадэ 19 жніўня выйшаў на волю пасля 10 дзён арышту за «распальванне міжнацыянальнай варожасці». Яго зняволенне выклікала хвалю абурэння сярод расейскіх комікаў.
Грамадзянін Беларусі Ідрак Мірзалізадэ нарадзіўся ў Азербайджане ў сям’і з народу талышаў, але калі яму было два гады, сям’я перабралася ў Менск. Пасля ўдзелу ў «Клубе вясёлых і знаходлівых» стаў выступаць на расейскай тэлевізіі, потым далучыўся да групы расейскіх комікаў.
У сакавіку 2021 года ў гумарыстычнай перадачы «Разгоны» ён пажартаваў пра расейцаў: расказваў, як цяжка «нярускаму» знайсці кватэру ў Маскве, між тым згадаў гідкую неахайнасць расейцаў, якія здымалі кватэру да яго.
На жарт звярнулі ўвагу расейскі ўльтраправы тэлеканал «Царьград» і тэлепрапагандыст Уладзімір Салаўёў. Пасля гэтага на Мірзалізадэ на вуліцы напалі невядомыя. Комік казаў, што за жарт, вырваны з кантэксту, яму сталі пагражаць радыкальныя супольнасці.
9 жніўня Мірзалізадэ арыштавалі на 10 дзён за «распальванне міжнацыянальнай варожасці» – за той самы жарт, за які яго ўжо пабілі. Комік не прызнаў сваёй віны і казаў, што выступ быў якраз супраць ксенафобіі.
Расейскія і беларускія комікі выказаліся супраць такога пакарання, якое назвалі страшным прэцэдэнтам. Яны заявілі, што за жарт нельга пазбаўляць волі.
Ці шукае паліцыя тых, хто напаў на коміка, невядома.
АА belsat.eu
