Расейская дзяржкарпарацыя «Роскосмос» прэзентавала эмблему карабля «Саюз МС-25» і паведаміла, што старт прызначаны на 21 сакавіка. У складзе экіпажу – бортправадніца «Белавіі» Марына Васілеўская.
Карабель «Саюз МС-25» даставіць на арбіту міжнародны экіпаж: расейскага касманаўта беларускага паходжання Алега Навіцкага, амерыканку Трэйсі Дайсан і сцюардэсу «Белавіі» Марыну Васілеўскую.
Старт на Міжнародную касмічную станцыю запланаваны на 21 сакавіка.
На прэзентаванай эмблеме – дзяржаўныя сцягі Расеі, Беларусі і ЗША, прозвішчы касманаўтаў і гара Казбек, гэта пазыўны экіпажу.
«Эмблема выкананая ў форме шчыта, што азначае перамогу і дасягненне мэтаў. Дзяржаўныя сцягі краінаў – удзельніц палёту нанесеныя ў форме трохкутніка, што азначае згуртаванне экіпажу», – адзначаецца ў паведамленні расейскай карпарацыі «Роскосмос».
Плануецца, што Навіцкі і Васілеўская прабудуць на МКС 12 содняў і вернуцца на Зямлю на караблі «Саюз МС-24», прыстыкаваным да станцыі.
Сцяпан Кубік belsat.eu