У Кіеве адбываецца першы суд над расейскім вайскоўцам, якога абвінавачваюць у ваенных злачынствах. Вадзім Шышымарын падчас судовага паседжання прызнаў віну ў забойстве бяззбройнага цывільнага жыхара, паведамляе BBC.
Паводле версіі пракуратуры, 28 лютага паблізу вёскі Камышы, што ў Сумскай вобласці, калону, дзе быў 21-гадовы сяржант Шышымарын, абстраляла ўкраінскае войска. Адступаючы, ён і чацвёра іншых расейскіх вайскоўцаў захапілі чужы аўтамабіль і сталі рухацца назад да мяжы.
Каля дому № 52 на вуліцы Лебядзінскай расейскія вайскоўцы пабачылі 62-гадовага мужчыну – Аляксандра Шаліпава, які размаўляў праз тэлефон. Шышымарыну быў аддадзены загад забіць чалавека, каб ён не распавёў пра іх украінскім вайскоўцам. Шышымарын некалькі разоў стрэліў з аўтамата.
«Мне загадалі стрэліць, і я стрэліў у яго адну чаргу, ён упаў. Мы паехалі далей», – патлумачыў Шышымарын.
Пазней Шышымарын і трое іншых вайскоўцаў трапілі ў палон. На пытанне суддзі, ці прызнае Шышымарын віну ў забойстве цалкам, ён адказаў сцвярджальна.
Мінабароны Расеі адмовілася каментаваць сітуацыю. У Маскве спасылаюцца на недахоп інфармацыі.
Адвакат Віктар Аўсяннікаў настойвае на перакваліфікацыі абвінавачання на больш мяккі артыкул, пакуль не ўдакладняючы, які менавіта.
Судовы працэс адкрыты, відэатрансляцыю можна глядзець на YouTube.
Раман Лугоўскі belsat.eu