Прэзідэнт Малдовы Мая Санду, выступаючы ў Еўрапарламенце, запатрабавала вывесці расейскіх вайскоўцаў з Прыднястроўя. Палітык адзначыла, што прысутнасць там расейскіх вайскоўцаў парушае нейтральны статус яе краіны, паведамляе point.md.
Прэзідэнт Малдовы падкрэсліла, што зараз няма непасрэднай пагрозы таго, што краіна будзе ўцягнутая ў вайну ва Украіне.
«Для таго, каб па-сапраўднаму быць нейтральным, неабходна вывесці расейскія войскі з нашай тэрыторыі. Таму што іх прысутнасць фундаментальна парушае наш нейтральны статус і незалежнасць», – сказала Санду.
Яна адзначыла, што ўлады настроены вырашыць гэтае пытанне мірным шляхам з захаваннем суверэнітэту і тэрытарыяльнай цэласнасці Малдовы. Спадарыня Санду адзначыла, што Кішынёў не хоча вайны.
Таксама яна адзначыла, што Расея здзейсніла агрэсіўны напад на суседнюю дзяржаву і паставіла на мяжу катастрофы народы Украіны і ўсяго еўрапейскага кантынента.
«Яны хацелі ператварыць Украіну ў геапалітычны прыдатак больш моцнага суседа. Мы ўсе спадзяваліся і чакалі, што гэтыя часы ўжо ніколі не вернуцца. Але яны вярнуліся», – заявіла Санду.
Таксама Санду падкрэсліла, што Малдова падтрымлівае суверэнітэт і тэрытарыяльную цэласнасць Украіны: «Крым – Украіна, Данбас – Украіна, Кіеў – Украіна, і заўсёды будуць Украінай».
Раман Лугоўскі belsat.eu