Ціханоўская сустрэлася з віцэ-прэзідэнткай «Google», перадала просьбы беларусаў
Абраная прэзідэнтка Беларусі Святлана Ціханоўская падчас Сусветнага эканамічнага форуму ў швейцарскім Давосе сустрэлася з віцэ-прэзідэнткай кампаніі «Google» Анэтэ Крэбэр-Рыль, расказаў Офіс Ціханоўскай.
Святлана Ціханоўская наведала ў Давосе «Дом Google», сустрэлася з прадстаўніцай кампаніі, абмеркавала шэраг пытанняў і перадала спіс канкрэтных запытаў ад беларускіх журналістаў і грамадзянскай супольнасці, а таксама дамовілася на наступную сустрэчу з Анэтэ Крэбэр-Рыль на Мюнхенскім форуме бяспекі 16–18 лютага.
Просьбы тычыліся наступнага:
- прыярытэзацыі беларускага кантэнту над расейскім для карыстальнікаў з нашай краіны;
- лакалізацыі сэрвісаў «Google» для Беларусі;
- падтрымання беларускамоўнага кантэнту;
- надання інструментаў «Google», а таксама арганізацыі трэнінгаў для медыяў і грамадзянскай супольнасці;
- стварэння беларускага інтэрфейсу сэрвісу «Gmail».
Дэмакратычныя сілы Беларусі даўно дамагаюцца ад буйных IT-кампаніяў падтрымання Беларусі і лакалізацыі сэрвісаў, кантактуюць таксама з распрацоўнікамі Facebook, X, TikTok, Netflix.
Справа не толькі ў тым, што IT-гіганты мала ўвагі надаюць беларускай мове і прапануюць беларусам спажываць расейскі кантэнт, але і ў тым, што дзяржаўным медыям даюць прыярытэт над недзяржаўнымі. На апошняе звяртала ўвагу Еўрапейская камісія.
Алесь Наваборскі belsat.eu
