Берасцейскі абласны суд 18 студзеня пачаў разгляд крымінальнай справы супраць палітзняволенай Дар’і Лосік. Муж Дарʼі журналіст Ігар Лосік таксама палітвязень. Праваабаронцы агучылі, што на судзе казала палітзняволеная.
Падчас паседжання ў Берасцейскім абласным судзе 18 студзеня дзяржабвінаваўца запытала для Дар’і Лосік пакаранне ў выглядзе 2-х гадоў пазбаўлення волі ў папраўчай калоніі ва ўмовах агульнага рэжыму. Прысуд агучаць 19 студзеня.
На пытанне суда, як Дарʼя ставіцца да ўсяго таго, што адбываецца, яна адказала:
«Калі мяне хацелі пакараць, я прыму гэта з гонарам. Але разам са мной пакаралі маю сямʼю, у тым ліку маю малую дачку».
«Так, я не адмаўляю тое, у чым мяне абвінавачваюць. Але прашу зразумець, што апошнія два гады былі вельмі цяжкімі ў маім жыцці. І цяпер мне балюча ўсведамляць, што мая дачка ідзе ў сад або на шпацыр не са мной, дзеліцца сваімі перажываннямі таксама не са мной. Асабіста я ніякай шкоды нікому не нанесла. Вельмі прашу суд улічыць гэты факт пры вынясенні прысуду.
Гатовая панесці пакаранне, калі я заслугоўваю яго. Але мне б вельмі хацелася, каб яно не перашкодзіла маёй дачцэ ў бліжэйшы час убачыць мяне і сказаць: «Мама, ты смешная, я цябе вельмі люблю», – сказала Дарʼя.
Дар’ю Лосік, жонку палітычнага вязня і журналіста радыё «Свабода» Ігара Лосіка, затрымалі 18 кастрычніка 2022 года. Сілавікі прыйшлі дамоў да Лосікаў а 8:00, сама Дар’я з двухгадоваю дачкою Паўлінай яшчэ спала. 1 лістапада Дар’ю прызналі палітзняволенай. Цяпер дачка Дарʼі ды Ігара застаецца ў бабулі з дзядулем, бацькоў Дар’і.
Алена Аляксандрава belsat.eu
