Савет міністраў Беларусі сваёй пастановай №607 ад 15 верасня ўстанавіў памер платы за рэгістрацыю ў сістэме электроннай чаргі на мяжы. Дакумент апублікаваны на Нацыянальным прававым партале і набывае моц праз 5 дзён.
Рэгістрацыя легкавога аўтамабіля, матацыкла і мапеда абыдзецца ў 0,3 базавых велічыні (9,6 рубля), цяжкавіка і аўтобуса – 1 базавую велічыню (32 рублі).
Ад рэгістрацыі ў чарзе і ўезду ў зону чакання вызваляюцца інваліды і ўдзельнікі ВАВ, дыпламаты, уладальнікі дыпламатычных і службовых пашпартоў Беларусі.
Таксама з зоны чакання без чаргі змогуць выязджаць фізічныя асобы, якія едуць з дзецьмі ў веку да 3 гадоў (акрамя пасажыраў аўтобусаў), і транспартныя сродкі пошты.
У жніўні Аляксандр Лукашэнка падпісаў указ № 280, якім адмяніў бязвыплатнае размяшчэнне транспартных сродкаў у зоне чакання і паслугу платнага бранявання часу ўезду транспартных сродкаў у пункт пропуску з зоны чакання.
Замест гэтага ўсе транспартныя сродкі пры іх уездзе ў зону чакання павінны аплаціць рэгістрацыю ў сістэме электроннай чаргі.
А з 1 верасня вырашана, што транспартнаму сродку, які пасля рэгістрацыі ў чарзе, пакідае зону чакання, анулююць чаргу. Гэта павінна зрабіць немагчымай схему, калі кіроўцы рэгістраваліся ў сістэме, а затым з’язджалі дадому і адсочвалі чаргу праз сайт «Белмытсэрвіса».
Якуб Хруст belsat.eu
