На вуліцах Санкт-Пецярбургу зноў з’явяцца адкліканыя беларускія аўтобусы вытворчасці МАЗу. Пра гэта паведамляе пецярбургская кампанія «Пассажиравтотранс».
Як гаворыцца ў паведамленні, спецыялісты Менскага аўтазаводу «дапрацавалі дзейныя сістэмы і механізмы аўтобусаў з мэтаю выключыць выпадкі патэнцыйных узгаранняў».
У «Пассажиравтотрансе»адзначаюць, што на кожную машыну склалі адпаведны акт, «які гарантуе яе бяспеку і дае магчымасць допуску да эксплуатацыі. Аўтобусы з пацверджанай адсутнасцю заўваг выходзяць на лінію».
У якасці дадатковай захады прадстаўнікі МАЗу праводзяць штодзённы кантроль тэхнічнага стану аўтобусаў, якія працуюць на маршрутах.
У пачатку жніўня кампанія «Пассажиравтотранс» заявіла пра спыненне выкарыстання 137 аўтобусаў вытворчасці Менскага аўтамабільнага заводу праз патэнцыйную магчымасць іх узгарання.
11 жніўня з гэтай нагоды выказаўся Аляксандр Лукашэнка, які адзначыў: паколькі беларускія аўтобусы папулярныя, то вытворца не паспявае задавальняць патрэбаў у іх. «Канкурэнты нас пачынаюць прыдушваць, спасылаючыся на пажар у аўтобусе ў Піцеры, яшчэ нешта… Цяпер дзяржаўная камісія працуе. Я скіраваў, каб разабраліся, у чым там пытанне. Жудасная канкурэнцыя, але мы яе вытрываем. Гэта добрыя, якасныя аўтобусы», – сказаў тады Лукашэнка.
Крыху больш як за год толькі ў Санкт-Пецярбурзе згарэлі як мінімум 6 аўтобусаў беларускай вытворчасці (тры з іх за чэрвень). На шчасце, абыходзілася без пацярпелых.
Раман Шавель belsat.eu
