Службовыя асобы пяці беларускіх кампаніяў пастаўлялі за завышаныя цэны лекі і медычныя тавары ўстановам аховы здароўя. Але былі схопленыя пры спробе ўцячы за мяжу, канфіскаваныя буйныя сумы валюты, арыштаваная маёмасць. Аб гэтым паведамляе прэсавая служба Камітэту дзяржкантролю.
17 красавіка сталі вядомыя падрабязнасці «маштабнай супрацьпраўнай дзейнасці службовых асоб пяці прыватных кампаніяў», якія пастаўлялі медычныя і фармацэўтычныя тавары ва ўстановы аховы здароўя. Паводле КДК, работнікі прыватных кампаніяў выкарыстоўвалі схему пастаўкі ў Беларусь названых тавараў ад замежных вытворцаў праз падстаўныя замежныя фірмы.
Схема была такая: службовыя асобы беларускіх кампаніяў дамаўляліся з замежнымі вытворцамі тавараў аб пастаўцы на тэрыторыю Рэспублікі Беларусь, і тавары накіроўваліся непасрэдна на адрас беларускіх субʼектаў гаспадарання. Дакументальна ж пастаўка афармлялася на адрас падкантрольных замежных арганізацыяў. Тыя ж у сваю чаргу, павялічваючы цану на тавары ў асобных пазіцыях у чатыры-пяць разоў, рэалізоўвалі яе беларускім кампаніям, дзе працавалі службовыя асобы. Пры гэтым пытаннямі набыцця тавараў займаліся службовыя асобы беларускіх арганізацый, а не фірмаў-пасярэдніц, якія былі ўключаныя ў схему толькі для афармлення ўгодаў куплі-продажу.
«У выніку розніца ў цэных асядала на рахунках замежных фірмаў-пасярэднікаў, падкантрольных беларускім кампаніям, а самі кампаніі завышалі выдаткі і цэны на медычныя і фармацэўтычныя тавары, якія пастаўляюцца ва ўстановы аховы здароўя рэспублікі. Нанесеная дзяржаве шкода ў выглядзе нявыплачаных падаткаў склала больш за Br 8,9 млн», – гаворыцца ў паведамленні КДК.
Супраць заснавальнікаў і кіраўнікоў кампаніяў распачалі крымінальныя справы. Двое з фігурантаў справы былі затрыманыя ў памежным пункце пропуску «Лоша» пры спробе выехаць за мяжу. Падазраваныя далі прызнальныя паказанні і садзейнічаюць у расследаванні крымінальных справаў.
КДК канфіскаваў у зламыснікаў больш за $ 250 тыс. і € 55 тыс., на маёмасць падазраваных, у тым ліку абʼекты нерухомасці і аўтамабілі прэміум-класу, накладзены арышт.
Паведамляецца таксама, што ў сферы аховы здароўя РБ у 2022 годзе органамі фінансавых расследаванняў Камітэту дзяржкантролю выяўлена 27 злачынстваў, у бюджэт паступіла больш за Br 14,5 млн.
Антон Тачняк belsat.eu