Суд Маскоўскага раёну Менску 12 красавіка агучыў вырак тэставальніку Юрыю Вуснічу. Яго прызналі вінаватым паводле ч. 1 арт. 342 («Арганізацыя і рыхтаванне дзеянняў, што груба парушаюць грамадскі парадак, або актыўны ўдзел у іх») Крымінальнага кодэксу і прысудзілі 2,5 года калоніі. Пра гэта паведамляе ПЦ «Вясна».
Юрый Вусніч скончыў Менскі радыётэхнічны каледж і Інстытут інфармацыйных тэхналогіяў БДУІР. Працаваў тэставальнікам. Быў затрыманы 13 студзеня 2022 года, утрымліваўся ў СІЗА № 1 Менску.
Паводле матэрыялаў абвінавачання, Юрый Вусніч браў актыўны ўдзел у акцыях пратэсту ў жніўні 2020 года ў Менску, у тым ліку на Плошчы і праспекце Незалежнасці, груба парушаў грамадскі парадак, выкрыкваў лозунгі, перашкаджаў руху грамадскага транспарту, не падпарадкоўваўся патрабаванням супрацоўнікаў унутраных справаў.
Суд пастанавіў прызнаць Юрыя Вусніча вінаватым і прызначыў яму пакаранне ў выглядзе пазбаўлення волі ў калоніі агульнага рэжыму тэрмінам на 2,5 года.
Вырак вынесла суддзя Таццяна Пірожнікава.
РР belsat.eu