Блогер Ян Рудзік далучыўся да беларускага добраахвотніцкага палку імя Кастуся Каліноўскага, які ваюе на баку Украіны. Пра гэта ён паведаміў у сваім Telegram-канале.
«Даў зарок. Цяпер ужо афіцыйна жаўнер Палка імя Кастуся Каліноўскага», – напісаў ён.
Полк Каліноўскага 17 сакавіка распаўсюдзіў відэа з навучальнага цэнтру падраздзялення, дзе скончылася падрыхтоўка чарговай групы рэкрутаў. Сярод навабранцаў, якія даюць прысягу, можна пабачыць і Яна Рудзіка.
«Цягам жыцця і ўласнай барацьбы за Беларусь мяне натхняюць ваярскія, рыцарскія вобразы з кніг Эволы і Юнгера, – прызнаецца Рудзік у сваім Telegram-канале, – Але ж быў упэўнены, што войска – гэта не для мяне. Заўжды меў праблемы з дысцыплінай і ўспрыняццем аўтарытэтаў, пра фізічную падрыхтоўку няма чаго і казаць. Але ж справа не мае сэнсу, калі ў яе не ўкладзеныя ўсе магчымыя намаганні.
Як перамагчы страшныя аўтарытарныя рэжымы, калі не здольны перамагчы сябе? Я зрабіў крок наперад. І не шкадую».
Ян Рудзік – блогер і журналіст, падчас падзеяў 2020 года працаваў у камандзе «Nexta». У Беларусі яго завочна прысудзілі да 19 гадоў зняволення.
Глеб Нержын belsat.eu