Беларускі праект «Саша і Сірожа» збіраецца з выступамі ў Расею, якія прыйдуцца на другую гадавіну пачатку вайны ва Украіне. Афіша з мерапрыемствамі з’явілася ў акаўнце на «Facebook» Аляксея Хацкевіча.
Канцэрт у Санкт-Пецярбургу пройдзе 23 лютага, у Маскву калектыў прыедзе 24 лютага – на гэты дзень прыходзіцца пачатак поўнамаштабнага ўварвання Расеі ва Украіну.
У каментарах пад фэйсбучным пастом людзі пачалі выказваць сваю незадаволенасць і казаць, што збіраюцца адпісацца ад Хацкевіча, на што апошні адказаў у рэзкай форме: «Похеру».
Праект «Саша і Сірожа» – мастацка-музычны праект, у якім бярэ ўдзел мастак Аляксей Хацкевіч і музыкі гуртоў «Ленинград», «НОМ», «Pep-See». Пачынаўся праект з дуэту Хацкевіча і Сяргея Міхалка.
Пра адраджэнне гурта стала вядома ў 2020-м, пра што паведаміў сам Міхалок. Удзельнікі збіраліся запісаць сумесны альбом і нават рыхтаваліся адправіцца ў тур па гарадах Украіны і Беларусі, але з нейкай прычыны альбом так і не выйшаў, а Міхалок не вярнуўся да дуэту. Займацца адраджэннем праекту Аляксей Хацкевіч працягнуў самастойна, у 2022 годзе ён выпусціў альбом пад назвай «Куй».
Раман Шавель belsat.eu
