493 дні ў Беларусі трывае палітычны крызіс пасля прэзідэнцкіх выбараў. Лукашэнка кажа, каму не падабаецца – едзьце ў Літву і Польшчу. «Белсат» пераказвае галоўныя падзеі 16 снежня.
Еўразвяз паабяцаў даставіць у Беларусь заходнія вакцыны ад каронавірусу. Беларускім уладам гэта раней ужо прапаноўвалі, але яны адмаўляліся. У Беларусі тым часам ужываюць толькі расейскія і кітайскія вакцыны. 16 снежня дазволілі ўжываць новую расейскую «КовіВак», якая яшчэ не прайшла III фазу выпрабаванняў.
Працягвае гучаць тэма абыходу санкцыяў супраць рэжыму Лукашэнкі. Кіраўніца Еўракамісіі Урсула фон дэр Ляен запэўніла карэспандэнтку «Белсату»: «У санкцыях не павінна быць прабелаў, мы стараемся іх закрыць». Міністарка замежных справаў Нарвегіі Анікен Гуітфэльт пагадзілася са Святланай Ціханоўскай адносна «Yara» і абыходу санкцыяў. За абыход санкцыяў давялося апраўдвацца МЗС Эстоніі.
У Беларусі ж забаронена заклікаць да санкцыяў. Аляксандр Лукашэнка 16 снежня заявіў сваім грамадзянам: «Калі ты хочаш быць абсалютна незалежным і заклікаць да санкцыяў, ваяваць супраць улады і іншае – вунь у Літве, Польшчы сядзяць, там яшчэ ёсць вакансіі».
Афіцыйны Менск хоча ўзяць у Расеі крэдыт на 3,5 мільярдаў долараў, каб залатаць дзірку ў дзярждоўгу, але не хоча ладзіць феерверкі на Новы год. І спыняць міграцыйны крызіс улады таксама не збіраюцца, на мяжы з Беларуссю параненыя два польскія вайскоўцы.
Палітычныя рэпрэсіі не спыняюцца ні на дзень. Пракуратура пачала крымінальную справу за скандаванне «Ганьба!» пасля прысуду Вітольду Ашурку. Брат Ашурка з’ехаў з Беларусі праз пагрозу крымінальнай справай. Супраць блогера Андрэя Павука распачалі крымінальную справу за «абразу прадстаўніка ўлады». За падпіскі на «экстрэмісцкія» Telegram-каналы затрымалі мастачку з кампаніі «Vizor Games». Фрылансер радыё «Свабода» Андрэй Кузнечык не выйшаў на волю пасля 20 дзён арышту. Гарадзенскі музыка Ігар Банцэр прабудзе ў карцары да дня свайго вызвалення. КДБ назвала «экстрэмісцкім фармаваннем» платформу «Сход». Заснавальніка Symbal.by Паўла Белавуса перазатрымалі, у заснавальніка «Кінашколы» Андрэя Палупанава правялі ператрус. Палітзняволеную Людмілу Царану прымушаюць звольніцца з працы. У Расеі затрымалі ўдзельніцу «Pussy Riot» Марыю Алёхіну – за партрэт Лукашэнкі са свастыкамі.
Але ёсць і добрыя навіны. У Горадню даставілі Віфліемскі агонь міру. Фільм Андрэя Куцілы «Калі кветкі не маўчаць» атрымаў спецыяльную згадку журы фестывалю «Watch Docs». Суд у Растове выпадкова прызнаў прысутнасць расейскіх вайскоўцаў на Данбасе.
Тым часам невядомы «Коба» запрашае беларускіх актывістаў, якія з’ехалі за мяжу, вярнуцца «пад гарантыі», але яму не вераць.
АА belsat.eu