Прэс-служба МУС паведамляе, што байцы гарадзенскага ГУБАЗіКу затрымалі 23-гадовага жыхара Ваўкавыскага раёну, які працуе аграномам.
Яго вінавацяць у тым, што ён на сваёй старонцы «Вконтакте» нібыта абражаў Аляксандра Лукашэнку і размяшчаў «экстрэмісцкія матэрыялы» (нагадаем, словы «экстрэмізм» і «дэструктыўная дзейнасць» прадстаўнікі рэжыму Лукашэнкі цяпер выкарыстоўваюць для абазначэння любой праявы пратэставых настрояў і іншадумства).
Мяркуючы па відэа МУС, затрыманне агранома праводзілася паказально жорстка.
На 23-гадовага жыхара Гарадзеншчыны складзены адміністратыўны пратакол за «распаўсюд інфармацыйнай прадукцыі, уключаны ў рэспубліканскі спіс экстрэмісцкіх матэрыялаў», а таксама распачата крымінальная справа за абразу Лукашэнкі.
У прэс-рэлізе МУС падкрэсліваецца, што аграном удзельнічаў летась у акцыях пратэсту ў Горадні.
- Паводле праваабаронцаў, з лета 2020 года адбываюцца самыя масавыя ў найноўшай гісторыі Беларусі рэпрэсіі. Цягам года ўва ўсёй краіне былі распачатыя больш за 5000 крымінальных справаў, звязаных з пратэстамі. На дзень 16 кастрычніка 812 асобаў прызнаныя палітычнымі вязнямі.
- З лета 2020 года тысячы пратэстоўцаў па ўсёй краіне сталіся ахвярамі мэтанакіраваных катаванняў, каля 35 000 чалавек былі затрыманыя ў адміністратыўным парадку. Згодна з рознымі ацэнкамі, у выніку палітыкі дзяржаўнага тэрору загінулі ад 4 да 20 асобаў. Пры гэтым ні за катаванні, ні за забойствы іншадумцаў да адказнасці нікога не прыцягнулі.
ІІ belsat.eu
