Новую акцыю прымусовага дзяржаўнага патрыятызму ладзіць у Фрунзенскім раёне Менску мясцовы «Зялёнбуд». Пра гэта паведамляе «Зеркало».
«Зялёнбуд» запатрабаваў ад прыватных арганізацыяў высадзіць кветкі і вывесіць сцягі на замацаваных за імі тэрыторыях. Зрабіць гэта трэба да 17 ліпеня. Тым, хто рабіць гэтага не будзе, пагражаюць штрафам паводле арт. 22.10 КаАП («Парушэнне правілаў добраўпарадкавання і ўтрымання населеных пунктаў»). Для юрыдычных асобаў гэта ад 740 да 3700 рублёў.
Прычына такой неабходнасці ў лістах ад «Зялёнбуду» не тлумачыцца. У самой арганізацыі паведамілі, што 14 ліпеня разаслалі такія лісты 35 арганізацыям.
Аб праведзенай працы трэба даць справаздачу: выслаць фота ў «Зялёнбуд» – або факсам, або на Viber. Са здымкам павінен быць суправаджальны ліст.
У студзені 2021 года Адміністрацыя Першамайскага раёну Менску запатрабавала ад IT-кампаніяў, якія ўваходзяць у ПВТ, усталяваць дзяржаўныя сцягі і на сваіх будынках.
Якуб Хруст belsat.eu